Qaraǵandy JEO: modernızatsııaǵa 44 mlrd teńgeden astam ınvestıtsııa salyndy
ASTANA. KAZINFORM — Energetıka mınıstri Erlan Aqkenjanov Qaraǵandy oblysyna jumys sapary aıasynda óńirdiń negizgi energetıkalyq nysandarynyń 2025–2026 jylǵy jylý berý maýsymyna daıyndyq barysyn tekserdi.
Mınıstrdiń aıtýynsha, Úkimettiń tapsyrmasymen qysqa daıyndyq kabınetterde esepter arqyly emes, tikeleı nysandarǵa baryp, naqty daıyndyqty kózben kórý arqyly baqylanady.
Topar GRES-ine barǵanda mınıstr týrboagregatty aýystyrýdyń sońǵy kezeńimen tanysty. Jańa jabdyqty iske qosý aǵymdaǵy jyldyń tamyz aıyna josparlanǵan jáne ol óńirdegi jylý berý senimdiligin arttyrady. Sonymen qatar, stantsııada jańa kúl-qoqys alańynyń qurylysy qarqyndy júrýde. Al Topar kentinde qyzmetkerlerge arnalǵan jańa turǵyn úıler salynady.
— Jyldar boıy sheshilmegen birqatar másele baryn bilemiz, biraq búgin naqty nátıjelerdi kórý mańyzdy. Topar GRES-inde qýaty joǵary jańa týrbına iske qosylady. Qarmet JEO-2-de jetinshi qazandyqtyń iske qosý jumystary aıaqtalýda, al Shahtınsk JEO turaqty jumys istep tur. Bul — naqty tapsyrmalardyń oryndalýynyń kórinisi, — dedi Erlan Aqkenjanov.
Sapar barysynda qarjylandyrý máselesi de sóz boldy. Topar GRES-ine 2025–2026 jyldarǵa arnalǵan jóndeý jáne ınvestıtsııalyq baǵdarlamaǵa 34,6 mlrd teńge bólingen. Sonymen qatar, óńirdiń jylý júıelerin jańartýǵa bıyl 10 mlrd teńgeden astam qarajat qarastyrylǵan. Negizgi ınvestıtsııalyq jobalardyń biri — Jezqazǵan qalasynda 75 MVt qýatty bý-gaz qondyrǵynyń qurylysy, bul óńirdegi elektr qýaty tapshylyǵyn azaıtýǵa múmkindik beredi.
Mınıstr kásiporyn qyzmetkerlerimen de tildesip, jumys barysyn baǵalady.
Energetıka mınıstrligi elimizdiń energetıkalyq nysandarynyń qysqa daıyndyq jumystaryn turaqty baqylaýda ustaıdy. Barlyq jóndeý jumysy josparǵa saı júrgizilip jatyr jáne Úkimettiń baqylaýynda.
Aıta ketelik Energetıka mınıstrligi Ekibastuzda jańa elektr stantsııasyn salýǵa tender jarııalaǵan edi.