Qaraǵandy, Ulytaý jáne Qyzylorda oblystarynda kólik qozǵalysyna shekteý qoıyldy

ASTANA. KAZINFORM – Aýa raıynyń qolaısyzdyǵyna baılanysty birqatar respýblıkalyq mańyzy bar avtojoldarda barlyq kólik túrleriniń qozǵalysyna ýaqytsha shekteý engizildi.

9 aqpan saǵat 16:00-de respýblıkalyq mańyzy bar «Astana – Qaraǵandy (aınalma jolymen) – Almaty» avtojolynyń 248-592 shaqyrym aralyǵyndaǵy ýchaskesinde, ıaǵnı Atameken aýylynan Balqash qalasyna deıin kólik qozǵalysy shekteldi.

Atalǵan joldy 10 aqpan saǵat 09:00-de ashý josparlanǵan.

Osy kúni saǵat 16:30-da aýa raıynyń buzylýyna baılanysty «Qyzylorda – Jezqazǵan – Qaraǵandy – Shiderti» avtojolynyń kelesi ýchaskelerinde barlyq kólik túrleriniń qozǵalysyna ýaqytsha shekteý engizildi.

Ulytaý oblysynda – avtojoldyń 750- 788 shaqyrym aralyǵy, Jańaarqa eldi mekeninen Qaraǵandy oblysynyń shekarasyna deıin.

Qaraǵandy oblysynda – 788-906 shaqyrym aralyǵy, Ulytaý oblysynyń shekarasynan Topar eldi mekenine deıin.

Bul baǵyttarda joldy 10 aqpan saǵat 09:00-de ashý kózdelip otyr.

Sonymen qatar 9 aqpan saǵat 17:00-de Qyzylorda oblysynda «RF shekarasy – Mártók – Aqtóbe – Qarabutaq – Qyzylorda – Shymkent – Taraz – Qordaı – Almaty – Qorǵas – QHR shekarasy» avtojolynyń 1362-1806 shaqyrym aralyǵyndaǵy ýchaskesinde, ıaǵnı Aral qalasynan Qyzylorda qalasyna deıin kóliktiń barlyq túriniń qozǵalysyna ýaqytsha shekteý qoıyldy. Bul joldy 10 aqpan saǵat 02:00-de ashý josparlanǵan.

Osy kúni Qaraǵandy oblysynda respýblıkalyq mańyzy bar «Qaraǵandy – Aıagóz – Tarbaǵataı – Buǵaz» avtojolynyń 60-217 shaqyrym aralyǵyndaǵy ýchaskesinde, Botaqara aýylynan Qarqaraly aýylyna deıingi baǵytta da barlyq kólik túrleriniń qozǵalysyna shekteý engizildi. Joldy 10 aqpan saǵat 09:00-de ashý josparlanyp otyr.

Qosymsha aqparatty táýlik boıy 1403 baılanys ortalyǵynan alýǵa bolady.

Aıta keteıik, buǵan deıin eki oblysta jol jabylǵany habarlanǵan bolatyn.