Qaraǵandy turǵyny jaralanǵan úkini qamqorlyǵyna aldy
QARAǴANDY. KAZINFORM - Qaraǵandylyq Anar Shaımerdenova bir jabaıy qustyń taǵdyryn túbegeıli ózgertti. En dalada aýyr jaralanǵan úkini úıine alyp kelip, onyń qutqarýshysy, qamqorshysy ári eń jaqyn dosyna aınaldy.
Anar Shaımerdenova Buqar jyraý aýdanyna sapary barysynda bir úkini baıqaıdy. Qus kókke kóterile almaıdy, bir qanaty qatty jaralanǵan. Ol oılanbastan qusty qutqarýǵa bel býǵan. Osylaısha, qustyń jarasyn emdeýge kirisip ketken.
— Demalys kúnderi otbasymyzben qala syrtynda boldyq, — deıdi Anar. — Qaraǵandydan shamamen 110 shaqyrymdaǵy Buqar jyraý aýdanynda dalada úkini kórdim. Ol sasqalaqtap, dybystan shoshyp, qatty qınalyp jatqandaı boldy. Kórmegendeı ótip kete almadym. Abaılap oramalmen orap, kólikke otyrǵyzdym, sý berdim. Jolda veterınarlyq klınıkaǵa habarlasýǵa tyrystym, biraq kesh bolǵandyqtan, barlyq klınıka jabyq edi. Qus bizdiń úıde túnedi, al tańerteń travmatologqa bardyq.
Dárigerler qustyń qanaty synǵanyna biraz ýaqyt bolǵanyn, tinderi nekrozǵa ushyraǵanyn anyqtaǵan. Veterınar qanatty saqtap qalý múmkin emestigin aıtyp, ampýtatsııa jasaǵan.
Otadan soń Anar úkini úıine aparyp, arnaıy nusqaýlyqqa sáıkes kútim jasaǵan. Ornıtolog qustyń jynysy men jasyn anyqtap, onyń segiz aılyq, erkegi ekendigin aıtqan. Jańa dosyna Anardyń otbasy «Qanatık» dep at qoıypty.
Qustyń saýyǵýy úshin jaqsy kútim men shydamdylyq qajet. Anar kúnine eki ret pıntsetpen tamaq berip, ınektsııa jasap, jarasyn tańyp, antıbıotık pen aýyrsynýdy basatyn dáriler beredi.
Áleýmettik jelidegi dostary onyń erligi týraly bilgeli keń ári yńǵaıly tor satyp alýǵa qoldaý kórsetti. Torǵa kirgen Qanatık balkonda kúsh jınap keledi.
— Qanatık óte meıirimdi, janynda otyryp sóılesseń, túsinetindeı kórinedi. Bul men úshin tek jańa tájirıbe ǵana emes, úlken jaýapkershilik, — deıdi Anar.
Qus tolyq saýyǵyp, kúsh-qýatyn jınaǵan soń, qutqarýshylary ony tabıǵatqa jaqynyraq, jaıly jerge — senimdi adamdarǵa tapsyrýdy josparlap otyr.
Osyǵan deıin «Aqjaıyq» memlekettik tabıǵı rezervatyndaǵy qustardyń ólimine baılanysty zertteý nátıjesi shyqqany jaıly jazǵan bolatynbyz.