Qaraǵandy turǵyny ultaralyq arazdyqty qozdyrdy degen kúdikpen qamaýǵa alyndy
QARAǴANDY. KAZINFORM — Qaraǵandyda áleýmettik jelidegi jarııalanymnan keıin ultaralyq arazdyqty qozdyrý faktisi boıynsha qylmystyq is qozǵaldy. Kúdikti dep tanylǵan 22 jastaǵy qala turǵyny ustalyp, sot sheshimimen eki aıǵa ýaqytsha ustaý ızolıatoryna qamaldy.
Áleýmettik jelide jarııalanǵan beıne qoǵam narazylyǵyn týdyrdy. Tergeý derekterine súıensek, onda qazaq ulty men musylmandarǵa qatysty qorlaıtyn jáne arandatýshy sıpattaǵy sózder aıtylǵan. Bul qoǵamda úlken rezonans týǵyzyp, quqyq qorǵaý organdarynyń nazaryn aýdartty.
Qaraǵandy oblystyq polıtsııa departamentiniń habarlaýynsha, jarııalanym áleýmettik jelige monıtorıng jasaý barysynda anyqtalǵan. Materıaldar birden protsessýaldyq sheshim qabyldaý úshin tıisti tergeý organdaryna jiberildi. Atalǵan derek boıynsha QR Qylmystyq kodeksiniń 174-baby 1-bóligine sáıkes qylmystyq is qozǵaldy. Bul bap — áleýmettik, ulttyq, rýlyq, násildik, tektik nemese dinı alaýyzdyqty qozdyrý úshin jaýapkershilikti kózdeıdi.
— Tergeý barysynda kúdiktiniń el aýmaǵynan tys jerge shyǵýǵa daıyndalyp jatqany belgili boldy. Osyǵan baılanysty ony qamaýǵa alý týraly ótinish berilip, 22 shildede Qaraǵandy qalasynyń tergeý soty bultartpaý sharasyn sanktsııalady. Qazirgi tańda kúdikti eki aı merzimge qamaýǵa alyndy, — delingen PD resmı habarlamasynda.
Buǵan deıin kúdiktiniń áleýmettik jelide kópshilikten keshirim suraǵan vıdeosy taraǵan bolatyn. Alaıda bul áreket tergeý organdarynyń sheshimine yqpal etpedi. Qazir is aıasynda keshendi lıngvıstıkalyq jáne dintaný saraptamalary taǵaıyndaldy. Tergeý aıaqtalǵan soń, zańǵa sáıkes naqty protsessýaldyq sheshim qabyldanady.
Aıta ketý kerek, Qylmystyq kodekstiń 174-baby boıynsha 2 jyldan 7 jylǵa deıingi merzimge bas bostandyǵynan aıyrý jazasy qarastyrylǵan. Sarapshylardyń aıtýynsha, mundaı ister etnosaralyq turaqtylyq pen qoǵamdyq kelisimge tikeleı áser etetindikten, asa muqııat qaraýdy talap etedi.
Qazirgi ýaqytta bul jaǵdaı quqyq qorǵaý organdarynyń baqylaýynda. Polıtsııa departamenti tergeý barysy týraly qoǵamdy ýaqtyly aqparattandyryp otyrýǵa ýáde berdi.
Eske sala keteıik, byltyr Almatyda áleýmettik jelide ultaralyq arazdyqty qozdyrǵan áıel adam ustalǵan bolatyn.