Qaraǵandy turǵyny ulyna der kezinde kómek kórsetpegen úsh medıtsınalyq uıymnan 5 mln teńge óndirip aldy

ASTANA. KAZINFORM – Qaraǵandy turǵyny 16 jastaǵy ulyna tıisti medıtsınalyq kómek kórsetilmegeni úshin qalalyq úsh medıtsınalyq mekemege qarsy sotqa shaǵym túsirip, moraldyq zııandy óteýdi talap etti. Sot talapkerdiń ýájderin qanaǵattandyrdy.

2023 jyldyń naýryzynda jasóspirim anasymen birge on kún boıy basylmaǵan joǵary qyzba, álsizdik jáne enjarlyq belgilerimen balalar aýrýhanasynyń jedel járdem bólimine túsken.

Jaǵdaıynyń aýyrlyǵyna qaramastan, medıtsına qyzmetkerleri ony tek táýlik boıy statsıonarǵa jatqyzýdy usynǵan. Anasy bul usynystan bas tartqanymen, bas tartý qujat júzinde rásimdelmegen jáne oǵan aýrýhanaǵa jatqyzý qajettiligi tolyq túsindirilmegen.

- Naýqas kúndizgi statsıonarǵa ornalastyrylǵan, alaıda onyń klınıkalyq belgilerin eskere otyryp, táýlik boıy baqylaý men qosymsha tekserýler qajet bolǵan. Dárigerler sterıldilikke arnalǵan aldyn ala qan taldaýynsyz antıbıotıkalyq em taǵaıyndaǵan. Medıtsınalyq jazbalardy júrgizýde de buzýshylyqtar anyqtaldy.

Keıin naýqastyń jaǵdaıy nasharlap, qaterli isikke kúdik týyndaǵan soń, ol táýlik boıy jumys isteıtin statsıonarǵa aýystyrylǵan. Biraq aýrýhana ákimshiligi men Densaýlyq saqtaý basqarmasy respýblıkalyq ortalyq mamandaryn shaqyrý nemese telemedıtsına arqyly keńes uıymdastyrý jáne beıindi mekemege aýystyrý múmkindigi týraly ýaqtyly habarlamaǵan, - dep jazdy Joǵarǵy sottan.

Sondaı-aq jalpy praktıka dárigeri qan taldaýynyń nátıjelerin durys baǵalamaǵan jáne balany onkogematologııalyq aýrýǵa kúdik bar ekenin rastaý úshin respýblıkalyq uıymǵa jibermegen.

Medıtsınalyq kómekke alǵash júgingennen keıin bir aı ótken soń jasóspirim respýblıkalyq medıtsınalyq mekemeniń jansaqtaý bóliminde kóz jumǵan.

Medıtsınalyq jáne farmatsevtıkalyq baqylaý komıteti beıindi mamandardy tarta otyryp júrgizgen tekserý barysynda medıtsınalyq qyzmet kórsetý kezinde birqatar óreskel buzýshylyqtar bolǵanyn rastady.

Birinshi satydaǵy sot talapkerdiń shaǵymyn qanaǵattandyryp, qaladaǵy úsh medıtsınalyq uıymnan moraldyq zalal úshin 5 mln teńge ótemaqy óndirip berdi.

Apellıatsııalyq alqa ata-ananyń balasynyń ólimine jáne medıtsınalyq qatelikterge baılanysty tereń emotsıonaldyq kúızelis pen aýyr moraldyq azap shekkenin eskerip, birinshi satydaǵy sottyń sheshimin ózgerissiz qaldyrdy.

Aıta keteıik, Qaraǵandy oblysynda qaıtarylǵan aktıvter esebinen 51 medıtsınalyq nysan salyndy.