Qaraǵandy turǵyny alaıaqtyq jasap, jábirlenýshilerge 20 mln teńge shyǵyn keltirgen

QARAǴANDY. KAZINFORM — Qaraǵandy qalasynyń 26 jastaǵy turǵyny Mańǵystaý oblysynyń aýmaǵynda ustaldy. Ol birneshe alaıaqtyq deregi boıynsha kúdikke ilindi. Bul týraly Polisia.kz jazdy.

Qaraǵandy oblysy polıtsııa departamentine qarasty Qazybek bı atyndaǵy polıtsııa bólimine plastık tereze men balkon ornatýǵa tapsyrys bergen azamattardan aryzdar túse bastaǵan. Tergeý málimetterine sáıkes, kúdikti ózin plastık terezelerdi ornatý sheberi retinde tanystyryp, turǵyndardan tapsyrys qabyldaǵan.

— Ol qyzmet kórsetýge kelisip, aldyn ala tólem alǵannan keıin baılanysqa shyqpaı, mindettemesin oryndamaǵan. Sonyń saldarynan azamattar kútken qyzmetine qol jetkize almaı, al kúdikti oblys aýmaǵynan boı tasalaǵan. Júrgizilgen jedel-izdestirý is-sharalary barysynda polıtseıler kúdiktiniń ornalasqan jerin anyqtap, ony Mańǵystaý oblysynda jaldamaly páterde júrgen jerinen ustady, — delingen habarlamada.

Jedel-tergeý tobynyń muqııat ári júıeli jumysynyń nátıjesinde 32 alaıaqtyq deregi anyqtalyp, barlyǵy bir qylmystyq iske biriktirildi. Keltirilgen jalpy materıaldyq shyǵyn kólemi 20 mln teńgeni qurady. Qazirgi ýaqytta kúdikti qamaýǵa alynyp, oǵan qatysty sotqa deıingi tergeý amaldary júrgizilip jatyr.

Polıtsııa azamattardy saqtyq sharalaryn qatań saqtaýǵa shaqyrady. Kez kelgen qyzmet túrine aldyn ala tólem jasamas buryn oryndaýshynyń jeke basyn, qujattaryn jáne qyzmetiniń zańdylyǵyn muqııat tekserý qajet.