Qaraǵandy turǵyndarynyń elektr energııasyna bereshegi 1,8 mlrd teńgeden asty

QARAǴANDY. KAZINFORM — Qaraǵandyda tutynylǵan elektr energııasynyń aqysyn ýaqytyly tólemeıtinder az emes. Qala turǵyndarynyń elektr energııasyna bereshegi 1,8 mlrd teńgeden asqan. «Qaraǵandy Jaryq» JShS ókilderi tólem jasaý merzimi, qaryz ótelmegen jaǵdaıda qoldanylatyn sharalar jáne kásiporyn qyzmet kórsetetin elektr jelileriniń aýqymy týraly aıtyp berdi.

Qaraǵandy turǵyndarynyń elektr energııasyna bereshegi 1,8 mlrd teńgeden asty
Foto: Freepik

«Qaraǵandy Jaryq» JShS málimetinshe, 2026 jylǵy 1 qarashadaǵy jaǵdaı boıynsha qala turǵyndarynyń elektr energııasy úshin qordalanǵan bereshegi shamamen 1,8 mlrd teńgege jetken. Bul — tutynýshylardyń paıdalanyp qoıǵan elektr energııasy úshin tóleýge tıis, biraq áli kúnge deıin ótelmegen qaryzy.

Qoldanystaǵy tártipke sáıkes, kommýnaldyq qyzmet aqysyn ár aıdyń 25-ine deıin tóleý qajet. Tólem aldyńǵy aıda tutynylǵan elektr energııasy úshin jasalady. Máselen, qarasha aıynyń 25-ine deıin turǵyndar qazan aıynda paıdalanǵan elektr energııasynyń aqysyn óteýge tıis.

Kásiporyn ókilderi tólem belgilengen merzimde jasalmasa, tutynýshyǵa ósimpul esepteletinin eskertedi. Al bereshek birneshe eseptik kezeń boıy ótelmeı, jınalyp qalsa, qaryzdy májbúrlep óndirip alý úshin tıisti qujattar sotqa joldanýy múmkin.

Budan bólek, elektr energııasynyń aqysyn tólemegen tutynýshylarǵa qatysty ony ajyratý sharasy da qoldanylady. Alaıda elektr qýatyn ajyratpas buryn abonentke bul týraly aldyn ala eskertý jiberiledi.

— Eger tutynýshy bereshegin ótemese, biz oǵan elektr energııasyn berýdi toqtatý týraly habarlama joldaýǵa májbúr bolamyz. Odan keıin elektrmen jabdyqtaýdy shekteý jóninde sheshim qabyldanady. Al birneshe eseptik kezeń boıynsha bereshegi bar tutynýshylarǵa qatysty qujattar qaryzdy sot tártibimen májbúrlep óndirip alý úshin joldanady, — dep habarlady «Qaraǵandy Jaryq» JShS.

Turǵyndardy elektr energııasymen úzdiksiz qamtamasyz etý úshin, eń aldymen, aýqymdy ınfraqurylymnyń úzdiksiz jumysyn qamtamasyz etý qajet. Kásiporynnyń teńgeriminde jalpy uzyndyǵy 5 253 shaqyrym áýe elektr jelisi men 1 744 shaqyrym kabeldik jeli bar.

Elektr jelileriniń edáýir bóligi Qaraǵandy qalasynyń aýmaǵynda ornalasqan. Qalada energetıkter 2 321 shaqyrym áýe jelisi men 1 472 shaqyrym kabeldik jelige qyzmet kórsetedi. Sonymen qatar 32 qosalqy stantsııa, 41 taratý pýnkti jáne 1 541 transformatorlyq qondyrǵy kásiporynnyń qaramaǵynda.

Qyzmet kórsetiletin ınfraqurylymnyń aýqymy tutynýshylar sanynan da baıqalady. Kásiporynnyń jaýapkershilik aımaǵynda 3 102 kóppáterli turǵyn úı men 30 491 jeke turǵyn úı bar.

Kompanııa ókilderi elektr energııasyn jetkizýshiler men ózge de seriktester aldyndaǵy qarjylyq mindettemelerin belgilengen merzimde oryndaýǵa tıis ekenin atap ótti. Sharttarda kózdelgen tólemder ýaqytyly jasalýy qajet. Sondyqtan tutynýshylardyń bereshegi qordalanǵan saıyn kásiporynnyń qarjylyq esep aıyrysýyna da salmaq túsedi.

Qaryzyn ótemegen tutynýshylarmen jumys qoldanystaǵy zańnama talaptaryna sáıkes júrgiziledi. Al tólemniń ýaqytyly túsýi kásiporynǵa elektr jelilerin kútip ustaý jónindegi mindettemelerin oryndap, tutynýshylardy úzdiksiz elektr energııasymen qamtamasyz etýge múmkindik beredi.

Buǵan deıin Qazaqstanda 2029 jyldyń sońyna deıin jalpy qýaty 13,3 GVt bolatyn jańa elektr energetıkasy nysandaryn iske qosý josparlanyp otyrǵanyn habarlaǵan bolatynbyz.