Qaraǵandy turǵyndary týrıstik agenttikke aldanyp qaldy: kúdikti qamaýǵa alyndy

QARAǴANDY. KAZINFORM — Qaraǵandy qalasynyń 30-dan astam turǵyny polıtseıge aryz jazyp, týrıstik kompanııaǵa aldanyp qalǵandaryn aıtyp shaǵymdanǵan, dep habarlaıdy Kazinform Іshki ister mınıstrliginiń baspasóz qyzmetine silteme jasap.

Mınıstrliktiń habarlaýynsha, Qaraǵandy qalasynyń 53 jastaǵy turǵyny polıtsııaǵa aryzdanǵan. Ol týrıstik agenttik ıesiniń alaıaqtyq áreketteriniń qurbany bolǵanyn jetkizgen.

Qaraǵandylyq áıel kópten kútken demalysyn uıymdastyrý úshin týragentke 900 myń teńge bergen eken, alaıda ýáde etilgen sapar júzege aspaı qalǵan.

«Atalǵan derek boıynsha sotqa deıingi tergeý bastaldy. Tergeý barysynda bul agenttikke qatysty osyndaı taǵy birneshe shaǵym tirkelgeni anyqtaldy. Qazirgi ýaqytta polıtsııaǵa osy týrıstik agenttiktiń qyzmetine shaǵymdanǵan taǵy 34 azamattyń ótinishi túsken. Kúdikti óz áreketin valıýta baǵamynyń kúrt ósýimen jáne sonyń saldarynan týyndaǵan qarjylyq qıyndyqtarmen túsindirgen»,  dep habarlady ІІM baspasóz qyzmeti.

Tergeý málimetine súıensek, jábirlenýshilerge keltirilgen jalpy materıaldyq zalal shamamen 52 mıllıon teńgeni quraıdy. Tergeýdiń obektıvti ári jan-jaqty júrgizilýin qamtamasyz etý maqsatynda kúdikti ýaqytsha qamaýǵa alyndy.

Eske sala ketsek, 2022 jyly «Týrıstik agenttik 45 mln teńgege aldady» dep 50 almatylyq turǵyn vıdeoúndeý jarııalaǵan edi.