Qaraǵandy, Temirtaý, Balqash qalalarynyń tsıfrlyq egizderi jasalady
ASTANA. KAZINFORM — Qaraǵandy, Temirtaý jáne Balqash qalalarynyń tsıfrlyq egizderin jasap, olardyń damý josparlaryn ázirleý kózdelip otyr. Bul mindet Memleket basshysynyń Joldaýyn júzege asyrý aıasynda Qaraǵandy oblysynda qolǵa alynatyn basym baǵyttardyń biri retinde belgilendi, dep habarlaıdy Qaraǵandy oblysy ákimdiginiń baspasóz qyzmeti.
Qaraǵandy oblysynda Memleket basshysynyń «Jańa tarıhı kezeńdegi Qazaqstannyń ózekti mindetteri» atty Joldaýyn júzege asyrýǵa baǵyttalǵan naqty sharalar aıqyndalady. Qujattyń negizgi basymdyqtaryn túsindirip, ony iske asyrý joldaryn talqylaý úshin óńirge Quryltaı depýtattary Ashat Aımaǵambetov, Vadım Basın, Únzıla Shapaq, Aleksandr Danılov jáne Aısulý Súleımenova keldi. Olar oblys turǵyndarymen, sonyń ishinde óndiris jumysshylarymen jáne jastarmen kezdesip jatyr.
Depýtattardyń óńirge jumys sapary oblys aktıvimen kezdesýden bastaldy. Jıynǵa Qazaqstan Halyq Keńesiniń músheleri men ortalyq memlekettik organdardyń ókilderi de qatysty. Kezdesýde Memleket basshysynyń tapsyrmalaryn oryndaý máseleleri talqylanyp, Qaraǵandy ındýstrııalyq óńiriniń damýyna tikeleı qatysty basym baǵyttarǵa aıryqsha nazar aýdaryldy. Atap aıtqanda, ónerkásipti jańǵyrtý, energetıka men ınfraqurylymdy damytý, ınvestıtsııa tartý, tsıfrlyq tehnologııalardy engizý jáne turǵyndardyń ómir súrý sapasyn jaqsartý máseleleri qaraldy.
Quryltaıdyń Áleýmettik-mádenı damý komıtetiniń tóraǵasy Ashat Aımaǵambetov áleýmettik saıasatty jańartý jáne kómekke muqtaj azamattardy ataýly qoldaý máselelerine toqtaldy.
— Bul — jańa Konstıtýtsııa qabyldanǵannan keıingi Memleket basshysynyń alǵashqy Joldaýy. Qujattyń basty ereksheligi — ár adam ózine tikeleı qatysty mańyzdy máselelerdiń jaýabyn taba alady. Máselen, muǵalim úshin óz quqyǵynyń qorǵalýy, pedagogterge túsetin artyq júktemeniń azaıtylýy mańyzdy bolsa, dárigerler eńbekaqynyń ósýi men medıtsına salasynyń damýyna nazar aýdarady. Al kásipkerler úshin jańa múmkindikter, memlekettik basqarý men salyq júıesindegi ózgerister mańyzdy. Quryltaı Prezıdent Joldaýyn júzege asyrýǵa baǵyttalǵan birneshe zań jobasyn ázirlep qoıdy, — dedi depýtat.
Jıynda «Halyqtyq qurylys» bastamasy da jeke talqylandy. Ony júzege asyrý úshin 2029 jyldyń sońyna deıin shamamen 6,5 trln teńge baǵyttaý josparlanyp otyr. Bul jergilikti kásiporyndardyń áleýetin arttyryp, óńirde jańa jumys oryndaryn ashýǵa múmkindik beredi.
Aısulý Súleımenovanyń aıtýynsha, depýtattar turǵyndarmen kezdesýde jastarǵa da erekshe nazar aýdarmaq. Olarǵa belsendilik tanytyp, aldyna naqty maqsat qoıa bilý, sapaly bilim alý qajettigin jetkizýdi kózdeıdi. Óıtkeni eldiń órkendeýine ár azamattyń qosqan úlesi mańyzdy.
Kezdesýde aıtylǵan usynystar Joldaýdy júzege asyrý jónindegi oblystyq biryńǵaı josparǵa engiziledi. Oblys ákimi Ermaǵanbet Bólekpaev ár mindettiń oryndalý merzimi men nátıjesine jaýapty tulǵalar naqty kórsetilgen jospar ázirleýdi tapsyrdy.
Basym mindetterdiń qatarynda jańa óndiris oryndaryn iske qosý, ınvestıtsııa tartý, ekonomıka men aýyl sharýashylyǵyn tsıfrlandyrý, jasandy ıntellekt tehnologııalaryn engizý jáne eldi mekenderdi abattandyrý bar. Sonymen qatar Qaraǵandy, Temirtaý jáne Balqash qalalarynyń tsıfrlyq egizderin jasap, árqaısysyn damytýdyń naqty josparlaryn ázirleý mindeti qoıyldy.
— Jumysymyzdyń basty ólshemi ótkizilgen jıyndar men ázirlengen qujattardyń sany emes, el ómirindegi naqty ózgerister bolýy kerek. Bul — turaqty jumys isteıtin kásiporyndar, senimdi ınfraqurylym, sapaly jumys oryndary jáne halyqqa qoljetimdi qyzmetter, — dep atap ótti óńir basshysy.
Búgin Quryltaı depýtattary Qaraǵandydaǵy kásiporyndar men joǵary oqý oryndaryn aralap, Temirtaý jáne Saran qalalaryna da barady.
Buǵan deıin Qaraǵandy oblysyn 2032 jylǵa deıin qandaı ózgerister kútip turǵanyn jazǵanbyz.
