Qaraǵandy tas jolynda shamamen 800 avtokólik kepteliste turyp qaldy

QARAǴANDY. KAZINFORM — Aqtútek boran saldarynan Qaraǵandydan Astanaǵa barar trassa boıynda 800-ge jýyq kólik kepteliste turyp qaldy, dep habarlaıdy Kazinform tilshisi.

Qaraǵandy oblysynda aýa raıynyń kúrt nasharlaýyna baılanysty eki negizgi baǵyt boıynsha: Qaraǵandy — Astana jáne Qaraǵandy — Pavlodar joldary jabyldy.

— Kún saıyn 10 myńnan astam kólik ótetin respýblıkalyq mańyzy bar Almaty — Ekaterınbýrg avtojolynda kúrdeli jaǵdaı qalyptasty. Temirtaý qalasynyń mańyndaǵy termınalda joldardyń jabylýyna baılanysty shamamen 800 avtokólik jınalyp qaldy, — dep málimdedi Qaraǵandy oblysy PD baspasóz qyzmeti.

Qaraǵandy oblysynyń polıtseıleri jol jaǵdaıyn qalypqa keltirý úshin barlyq qajetti sharalardy qabyldaýda. Jaqyn arada avtokolonnanyń Aqmola oblysynyń shekarasyna deıingi baǵytta qaýipsiz jetýin qamtamasyz ete otyryp, ilesip júrý uıymdastyrylady.

Qaraǵandy oblysynyń polıtsııa departamenti óńir turǵyndary men qonaqtaryn eldi mekenderden tys jerlerge asa qajettiliksiz shyqpaýǵa shaqyrady. Jol jaǵdaıy týraly ózekti aqparat alý úshin 112 qyzmetiniń habarlamalaryn qadaǵalaýǵa keńes beriledi.

Eske sala keteıik, buǵan deıin aýa raıynyń qolaısyzdyǵyna baılanysty birneshe oblysta jol jabylǵanyn jazǵan bolatynbyz.