«Qaraǵandy Sý» mekemesiniń eki qyzmetkeri jumys barysynda kóz jumdy

QARAǴANDY. KAZINFORM — Qaraǵandyda eki kommýnaldyq qyzmetkeriniń mert bolýyna baılanysty qylmystyq is qozǵaldy. Er adamdar káriz qudyǵynda jóndeý júrgizý kezinde ýly gazdan ýlanyp mert bolǵan. Qaıǵyly jaǵdaıǵa baılanysty tıisti organdar tergeý júrgizip jatyr.

Oqıǵa josparly jumys barysynda oryn alǵan. Aldyn ala málimetterge sáıkes, 29 jáne 46 jastaǵy «Qaraǵandy Sý» JShS qyzmetkerleri káriz qudyǵynda ornalasqan datchıkterdi jóndeý kezinde kúkirtti sýtek tárizdi ýly gazben ýlanǵan. Jumysshylar oqıǵa ornynda qaza tapqan.

— Eki er adamnyń qaza bolý faktisi boıynsha qylmystyq is tirkeldi. Aldyn ala málimetter boıynsha, olar jóndeý jumystaryn júrgizý kezinde kanalızatsııalyq gazǵa ýlanǵan. Qazirgi tańda qajetti saraptamalar taǵaıyndaldy, barlyq tergeý áreketteri júrgizilip jatyr, — delingen Qaraǵandy oblysynyń PD baspasóz qyzmeti taratqan habarlamada.

Qaıǵyly jaǵdaıǵa qatysty túsinikteme bergen «Qaraǵandy Sý» JShS de bul aqparatty rastady:

— Atalǵan fakt rastalady. «Qaraǵandy Sý» JShS-niń eki qyzmetkeri qyzmettik mindetterin oryndaý kezinde qaza tapty. Qazirgi ýaqytta arnaıy komıssııa jumys isteýde, sondaı-aq eńbek ınspektsııasy tarapynan tekseris júrgizilip jatyr. Іshki qyzmettik tergeý bastaldy, — dep habarlady kásiporynnyń baspasóz qyzmeti.

Oqıǵa ornynda eńbek ınspektsııasynyń ókilderi qatysatyn arnaıy komıssııa jumys júrgizip jatyr. Marqumdardyń ólim sebebin anyqtaý úshin sot-medıtsınalyq jáne tehnıkalyq saraptamalar taǵaıyndalǵan. Qylmystyq is eńbek qaýipsizdigi talaptarynyń saqtalýyna qatysty bap boıynsha qaralyp jatryr. 

Osyǵan deıin Qaraǵandyda birneshe kóshede sýyq sý magıstraliniń tozý deńgeıi 83%-dan 100%-ǵa deıin jetkeni jaıly habarlaǵan bolatynbyz. Bıyl tarıfterdi ósirý arqyly jóndeý jumystaryna qomaqty qarajat bólinbek.