Qaraǵandyda Kostenko shahtasyndaǵy jarylysqa qatysty sot bastaldy

QARAǴANDY. KAZINFORM – Búgin «ArselorMıttal Temirtaý» AQ Kostenko atyndaǵy kómir shahtasyndaǵy jarylysqa qatysty qylmystyq is boıynsha aldyn ala sot tyńdaýy bastaldy. Bul týraly Qaraǵandy oblysy prokýratýrasy málim etti.

— 2023 jylǵy 28 qazanda jerasty tazartý qazbalarynda bolǵan qaıǵyly oqıǵa nátıjesinde 46 kenshi qaza taýyp, taǵy 28 kenshi jaraqat alǵan bolatyn. Sot otyrysyna memlekettik aıyptaýshylar, jábirlenýshiler, olardyń ókilderi, sottalýshylar men qorǵaýshylar qatysty, — delingen prokýratýra habarlamasynda.  

Eske sala keteıik, qylmystyq isti Bas prokýratýra tergep, nátıjesinde shahta basshylyǵy men ınjenerlik-tehnıkalyq qyzmetkerlerdiń qatarynan 10 adam sotqa tartylǵan bolatyn.

Barlyǵyna Qazaqstan Respýblıkasy Qylmystyq kodeksiniń 277-babynyń 3-bóligi boıynsha aıyp taǵyldy (taý-ken jumystaryn júrgizý kezinde qaýipsizdik erejelerin buzý). Sottalýshylar qamaýda. Іs boıynsha 74 adam jábirlenýshi dep tanyldy. Qylmystyq is Qazaqstan Respýblıkasy ІІM Qylmystyq-atqarý júıesi komıtetiniń «№ 61 mekeme» RMM ǵımaratynda qaralady.

Eske sala keteıik, Kostenko shahtasyndaǵy qaıǵyly oqıǵaǵa kináliler 8 jylǵa deıin bas bostandyǵynan aıyrylýy múmkin ekenin jazǵan bolatynbyz.