Qaraǵandy shahtasyndaǵy oqıǵa: Frantsııa jáne Qyrǵyzstan prezıdentteri kóńil aıtty
Frantsııa prezıdenti Emmanıýel Makron men Qyrǵyzstan basshysy Sadyr Japarov Kostenko shahtasyndaǵy tótenshe jaǵdaıdan qaza tapqan qazaqstandyqtardyń otbasylaryna kóńil aıtty, dep habarlaıdy Kazinform agenttigi.
«Qazaqstanǵa resmı saparyma, qazaq halqyna degen dostyq qarym-qatynasymdy kórsetýge birneshe kún qalǵanda el shahtalarynyń birindegi qaıǵyly jaǵdaı týraly habar keldi. Shahtada qaza bolǵandardyń týystary men jaqyndaryna kóńil aıtamyn», – dep jazdy Emmanıýel Makron Facebook jelisinde.
1 qarashada Memleket basshysy Qasym-Jomart Toqaevtyń shaqyrýymen Frantsııa prezıdenti Emmanıýel Makron Qazaqstanǵa resmı saparmen keletinin jazǵan bolatynbyz.
Sadyr Japarov bútin qyrǵyz jurty atynan kóńil aıtty.
«Qazaqstannyń Qaraǵandy oblysy Kostenko atyndaǵy shahtada bolǵan apat saldarynan adamdardyń kóz jumýyna baılanysty barlyq qyrǵyz halqynyń jáne óz atymnan qaıǵyra kóńil aıtamyn.
Orny tolmas qazaǵa ortaqpyz, mert bolǵandardyń otbasylary men jaqyndaryna tózimdilik jáne berik bolýdy tileımiz. Zardap shekkenderdiń barlyǵyna jyldam saýyǵyp ketýge tilektespin», - dedi Qyrǵyzstan prezıdenti.
Sondaı-aq Túrkııa Syrtqy ister mınıstrligi Facebook-tegi resmı paraqshasy arqyly Qazaqstan halqyna kóńil aıtty.
«Qazaqstandaǵy shahtada apat bolǵanyn kúızelispen qabyldadyq. Qaza bolǵandardyń jaqyndaryna kóńil aıtamyz jáne zardap shekkenderge tezirek saýyǵyp ketýdi tileımiz.
Túrkııa dos ári baýyrlas el – Qazaqstan úkimetimen jáne halqymen árdaıym birge ekenin jetkizemiz», - delingen jazbada.
Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr.
29 qazan Jalpyulttyq aza tutý kúni bolyp jarııalandy. Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
