Qaraǵandy polıtseıleri kúrekpen qum seýip, júzdegen júk kóligine jol ashty
QARAǴANDY. KAZINFORM — Qolaısyz aýa raıy jaǵdaıynda jol qaýipsizdigin qamtamasyz etý maqsatynda Qaraǵandy oblysy patrýldik polıtsııa batalonynyń qyzmetkerleri táýlik boıy kúsheıtilgen rejımde jumys atqaryp keledi. Aqsý-Aıýly kentinen oblys ortalyǵyna deıin 300-den astam júk kóligi polıtsııanyń úzdiksiz jetegimen qaýipsiz túrde jetkizildi, dep habarlaıdy Polisia.kz.
Jaýyn-shashynnyń kúsheıýi, qatty jel men ara-tura jaýǵan qar jol qozǵalysyn aıtarlyqtaı qıyndatyp, keıbir ýchaskelerde kólikterdiń qozǵalysy múldem toqtaǵan.
Osyndaı syn saǵatta polıtsııa qyzmetkerleri arnaıy tehnıkany kútpeı, qoldaryna kúrek alyp, jol jamylǵysyna qumdy óz qoldarymen septi. Nátıjesinde taıǵanaq ýchaskelerde kólikterdiń qozǵalysy qalpyna keltirilip, júrgizýshilerge jedel kómek kórsetildi.
— Búgingi kún patrýldik polıtsııa batalony úshin asa qaýyrt ótip jatyr. Qazirgi ýaqytta Aqsý-Aıýlydan oblys ortalyǵyna deıin 300-den astam júk kóligin jetkizdik. Keıbir ýchaskelerde kólikter eńiske shyǵa almaı toqtap qaldy. Mundaı jaǵdaıda jolǵa kúrekpen qum seýip, qozǵalysty qaıta jandandyrdyq. Basty maqsatymyz — jolda qalǵan azamattardy dittegen jerine aman-esen jetkizý, — dedi qaýipsizdik sharalaryn tikeleı uıymdastyryp júrgen batalon komandıri Medet Nurmuhanov.
Aıta ketý kerek, qazirgi ýaqytta patrýldik polıtsııa batalonynyń 150 qyzmetkeri men 70 ekıpajy táýlik boıy jol qaýipsizdigin qamtamasyz etip jatyr.
Polıtsııa qyzmetkerleri aýa raıynyń kúrt nasharlaýyna baılanysty azamattardy alys jolǵa shyqpaýǵa, al jolǵa shyqqan jaǵdaıda qozǵalys qaýipsizdigi talaptaryn qatań saqtaýǵa shaqyrady.
Eske sala keteıik, buǵan deıin eki oblysta kólik qozǵalysyna shekteý qoıylǵanyn jazdyq.
Sonymen qatar ІІM kólik júrgizýshilerine úndeý jasap, 20-dan astam ýchaske jabylǵanyn habarlady.