Qaraǵandy ortalyǵynda tórt kólik soqtyǵysty
QARAǴANDY. KAZINFORM – Jol apaty qarbalas ýaqytta Buqar jyraý dańǵylynda bolǵan. Alǵashqy soqtyǵysýdan keıin ınertsııamen taǵy eki kólikke zaqym kelgen. Eki júrgizýshi dárigerlerdiń kómegine júgindi.
Qaraǵandy oblystyq polıtsııa departamentiniń málimetinshe, jol-kólik oqıǵasy 21 qarasha kúni saǵat 16:04 shamasynda Buqar jyraý dańǵylynda tirkelgen. Apatnf Lada Priora, Chery, Kia Optima jáne Chevrolet Aveo markaly tórt avtokólik zaqymdanǵan.
– Jol-kólik oqıǵasy saldarynan Lada Priora jáne Chery avtokólikteriniń júrgizýshileri medıtsınalyq mekemege jetkizildi. Atalǵan derek polıtsııada tirkeldi. Qazirgi ýaqytta oqıǵanyń mán-jaıy anyqtalyp jatyr, – dep habarlady Qaraǵandy oblysynyń polıtsııa departamenti.
Al oblystyq densaýlyq saqtaý basqarmasynyń málimetinshe, zardap shekkender dárigerlerdiń tekserýinen ótken. Alaıda olar aýrýhanaǵa jatýdan bas tartyp, ambýlatorııalyq baqylaýǵa jiberilgen.
Áleýmettik jelilerde taraǵan beınejazbada jol apatynyń qalaı bolǵany kórsetilgen. Beıneden Chery avtokóliginiń júrgizýshisi oń jaq shetki jolaqta jyldamdyǵyn báseńdetkenin baıqaýǵa bolady. Jol jıegine qoıylǵan kólikter júris bóliginiń bir bóligin alyp, qozǵalysqa kedergi keltirgen. Osy sátte artynan joǵary jyldamdyqpen kele jatqan Lada Priora Chery kóligine soǵylady. Soqqydan keıin eki avtomobıl ınertsııamen alǵa qaraı jyljyp, joldaǵy taǵy eki kólikke tıedi.
Jazbaǵa pikir qaldyrǵan qala turǵyndary dańǵyl boıyndaǵy turaq máselesin kótergen. Olardyń aıtýynsha, keıbir ýchaskelerde turaqqa qoıylǵan kólikter oń jaq jolaqtyń edáýir bóligin alyp, basqa júrgizýshilerdi jyldamdyqty kúrt tómendetýge nemese jolaq aýystyrýǵa májbúr etedi.
Turǵyndar turaq oryndarynyń tereńdigi jetkiliksiz bolǵandyqtan, kólikterdiń bir bóligi qozǵalys bóligin jaýyp tastaıtynyn da atap ótken.
Oqıǵanyń naqty sebepteri men mán-jaıyn polıtsııa anyqtap jatyr.
Buǵan deıin Astana – Petropavl tasjolynda bolǵan aýyr jol apatynan keıin dárigerler jańa týǵan náresteniń ómirin aman alyp qalǵany habarlanǵan bolatyn.