Qaraǵandy oblystyq ekonomıka basqarmasyna jańa basshy taǵaıyndaldy
ASTANA. KAZINFORM – Qaraǵandy oblysynyń ekonomıka basqarmasynyń basshysy bolyp Dýlat Kárimuly Áshkenov taǵaıyndaldy. Kadrlyq ózgerister týraly apparat otyrysynda oblys ákimi Ermaǵanbet Bólekpaev málim etti.
Dýlat Áshkenov - Qaraǵandy oblysynyń týmasy, eki joǵary bilimi bar: Qaraǵandy memlekettik tehnıkalyq ýnıversıtetin «kólik, kóliktik tehnıka jáne tehnologııa» mamandyǵy boıynsha jáne Qaztutynýodaǵy Qaraǵandy ekonomıkalyq ýnıversıtetin «ekonomıka» mamandyǵy boıynsha bitirgen.
Memlekettik qyzmette 14 jyldan astam ýaqyt eńbek etip keledi.
Ár jyldary Qaraǵandy oblysynyń jol-kólik ınfraqurylymy men jolaýshylar kóligin damytý boıynsha memlekettik qurylymdarda jumys istedi.
Elordada Esil aýdany ákiminiń apparatynda, qalalyq ortany qalpyna keltirý basqarmasynda jumys istedi, aktıvter jáne memlekettik satyp alý basqarmasynda basshylyq qyzmetterde boldy.
Sodan keıin Almaty qalasy Kommýnaldyq ınfraqurylymdy damytý basqarmasynda jumys istedi - aldymen basshynyń orynbasary, 2024 jyldyń mamyrynan bastap qazirgi taǵaıyndaýǵa deıin sol memlekettik mekemeni basqardy.
Osyǵan deıin ótken aptada jergilikti ákimdikter, mınıstrlikter deńgeıinde jáne sport salsynda birqatar kadrlyq aýys-túıis bolǵanyn habarlaǵanbyz.