Qaraǵandy oblysynyń joldarynda 550-den astam kólik keptelicte turyp qaldy

QARAǴANDY. KAZINFORM — Qaraǵandy oblysynyń aýmaǵyndaǵy aýa raıynyń qolaısyzdyǵyna baılanysty barlyq respýblıkalyq jáne oblystyq mańyzy bar avtojoldar ýaqytsha jabyldy, dep habarlaıdy Kazinform tilshisi.

Qaraǵandy óńirinde azamattardyń qaýipsizdigin qamtamasyz etý jáne jol-kólik oqıǵalarynyń aldyn alý maqsatynda oblystyq Polıtsııa departamentiniń patrýldik polıtsııa batalony kúsheıtilgen qyzmet atqarý rejımine kóshti. Avtojoldardyń negizgi ýchaskelerinde patrýldik polıtsııa narıadtarynyń sany artty.
Jol qozǵalysynyń shektelýine baılanysty Qaraǵandy — Astana baǵytynda shamamen 500 avtokólik, al Qaraǵandy — Balqash tasjolynda 50-den astam kólik quraly jolda qalyp otyr.

— Polıtsııa qyzmetkerleri kólik júrgizýshileri men jolaýshylardyń qaýipsizdigin qamtamasyz etý maqsatynda avtokolonnalardy uıymdasqan túrde alyp júrýde. Máselen, Temirtaý termınalynan Aqmola oblysynyń shekarasyna deıin 500-ge jýyq kólik qaýipsiz túrde jetkizildi. Kólik kalonnasyn alyp júrer aldynda patrýldik polıtsııa batalonynyń komandıri Medet Nurmuhanov júrgizýshilerge nusqama júrgizip, olardyń jol júrý erejesin qatań saqtap, jyldamdyqty shekten tys asyrmaýdy eskertti, — dep habarlady PD baspasóz qyzmeti. 

Qaraǵandy oblysynyń Polıtsııa departamenti júrgizýshilerge alys saparǵa shyǵýdan ýaqytsha bas tartyp, aýa raıynyń jaqsarýyn kútýdi jáne joldardyń jaǵdaıy týraly jańartylǵan aqparatty muqııat qadaǵalaýdy usynady.

Eske salsaq, aýa raıynyń qolaısyzdyǵyna baılanysty elimizdiń birqatar óńirinde respýblıkalyq jáne oblystyq mańyzy bar jol ýchaskeleri jabylǵany jaıly habarlaǵan bolatynbyz.