Qaraǵandy oblysynyń turǵyny qarjy pıramıdasyn qurdy degen kúdikke ilindi

Qaraǵandy oblysynyń turǵyny qarjy pıramıdasyn qurý jáne basqarý kúdigi boıynsha tergelip jatyr, dep habarlaıdy QazAqparat.  

Tergeý barysynda anyqtalǵandaı, Qaraǵandy oblysynyń turǵyny buryn qarjy pıramıdasy arqyly halyqtan aqsha jınaǵany úshin sottalǵan, ol jeke tulǵalardan 50%-dan 300%-ǵa deıingi mólsherdegi tólemdi ýáde ete otyryp, 1 kúnnen 3 kúnge deıingi merzimge 50 myńnan 300 myń teńgege deıin kóleminde qarajat tartý arqyly WhatsApp jáne Telegram messendjerlerinde chat qurǵan. Aqsha banktik qosymsha arqyly aýdarylǵan.

Qarjylyq monıtorıng agenttigi kúdikti ustalyp, oǵan qatysty 2 aı merzimge qamaýǵa alý túrindegi bultartpaý sharasy qoldanylyp, ýaqytsha ustaý ızolıatoryna qamalǵanyn málimdedi.

Aldyn ala tergeý «Ózimiz goı Araı» chatynda 100-den astam qatysýshyny anyqtady. Qazirgi ýaqytta «Lıýks chat», «Chek chat Lıýks 100%», «Vklad chat 50%» dep atalatyn chattardyń salymshylaryn anyqtaýǵa baǵyttalǵan tergeý áreketteri júrgizilip jatyr.

QR QPK 201-babyna sáıkes ózge de málimetter jarııa etýge jatpaıdy.

Agenttik azamattardy qyraǵy bolýǵa jáne óz jınaqtaryn kúmándi qarjy uıymdaryna salmaýǵa shaqyrady.

«QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi», - delingen habarlamada.