Qaraǵandy oblysynyń tas jolynda jıyrmaǵa jýyq kólik soqtyǵysyp qaldy

QARAǴANDY. KAZINFORM — Qaraǵandy oblysy Shet aýdany Aqsý-Aıýly aýylynyń mańynda 19 avtokólik soqtyǵysyp qaldy. Saldarynan alty adam zardap shekti.

— Saǵat 12:30. Qaraǵandy oblysynda Aqsý-Aıýly aýylynan 20 shaqyrym jerde «Ekaterınbýrg-Almaty» avtojolynyń qaıta qurý ýchaskesinde aldyn ala málimet boıynsha 19 jeńil kólik soqtyǵysty, — dep habarlaıdy Qaraǵandy oblysy TJD baspasóz qyzmeti.

Oqıǵa ornyna qutqarýshylar, psıhologtar, TJM apattyq medıtsına ortalyǵy jáne jedel járdem dárigerleri keldi. JKO qatysýshylaryn jylýmen qamtamasyz etý úshin TJM vahtalyq arnaıy kóligi jumyldyryldy.

— Qazirgi ýaqytta keptelis joq, qozǵalys qarsy jolaqpen júzege asyrylýda, — dep tolyqtyrdy vedomstvodan.

Qaraǵandy oblysy PD málimdeýinshe, bul JKO qatysýshylary kolonnalyq qozǵalysqa qatyspaǵan.

Polıtseılerdiń aıtýynsha, Balqash qalasy jaǵynan erip kele jatqan kolonna Aqsý-Aıýly aýylyna 12.00 saǵat shamasynda jetken.

— JKO saldarynan túrli jaraqattarmen 6 adam medıtsınalyq mekemege jetkizildi. Keıbir áleýmettik jelide qaza tapqan adam týraly aqparat jarııalandy, bul málimet shyndyqqa sáıkes kelmeıdi. JKO-nyń aldyn ala sebebi — jyldamdyq rejımin jáne qaýipsiz qashyqtyqty saqtamaý, — dep túsindirip ótti Qaraǵandy oblysynyń PD.

Oqıǵa ornynda jedel-tergeý toby jumys isteýde.

Esterińizge sala keteıik, 3 qańtarda Aqmola oblysyndaǵy «Astana-Şýchınsk» tas jolynda jappaı JKO oryn alǵan edi. Oqıǵada 95 kólik zardap shekti.