Qaraǵandy oblysynyń sý aıdyndarynda jyl basynan beri 12 adam qaza boldy
QARAǴANDY. KAZINFORM – Qaıǵyly jaǵdaılardyń basym bóligi shomylýǵa arnalmaǵan jerlerde bolǵan. Qaıǵyly oqıǵalardyń negizgi sebepteri – óz múmkindigin asyra baǵalaý, júze bilmeý jáne balyq aýlaý kezinde qaýipsizdik talaptaryn saqtamaý.
Qaraǵandy oblysynda shomylý maýsymy aıaqtaldy. Tótenshe jaǵdaılar departamentiniń málimetinshe, jyl basynan beri óńirdiń sý aıdyndarynda 12 adam, onyń ishinde úsh bala mert bolǵan. Salystyra ketsek, 2025 jyldyń osy kezeńinde 14 adam sýǵa ketken.
Tek jaz aılaryn alatyn bolsaq, statıstıka sál ózgeshe. Shomylý maýsymy kezinde alty adam mert bolǵan, al byltyr bul kórsetkish 10 adamdy quraǵan. Osylaısha, sýdaǵy qaıǵyly jaǵdaılar sany 40%-ǵa azaıǵan.
Bul rette qaıǵyly jaǵdaılardyń barlyǵy demalys oryndarynan tys jerlerde bolǵanyn aıta ketý kerek. Sondaı-aq qaza bolǵan alty adamnyń bireýi ǵana resmı jaǵajaıda – Balqash jaǵalaýyndaǵy Toranǵalyq kentinde ornalasqan «Tulpar» demalys aımaǵynda sýǵa batqan.
Oqıǵalardyń mán-jaıyn taldaý qaıǵyly jaǵdaılardyń eń jıi sebepteriniń biri adamnyń óz múmkindigin asyra baǵalaýy bolǵanyn kórsetti – mundaı úsh jaǵdaı tirkelgen. Taǵy eki adam júze bilmegen. Dál osynsha adam balyq aýlaý kezinde qaýipsizdik talaptaryn buzýdyń saldarynan kóz jumǵan. Eki jaǵdaıda qaıǵyly oqıǵa basqa adamdy qutqarýǵa áreket jasaý kezinde bolǵan.
Ózge sebepterdiń qatarynda balalardy qaraýsyz qaldyrý, muz astyna qulaý jáne júzý quraldaryn paıdalaný erejelerin buzý bar.
Oblys boıynsha shomylýǵa ruqsat etilgen barlyǵy 143 oryn belgilengen. Onyń 134-i jeke, toǵyzy kommýnaldyq jaǵajaı. Maýsym bastalar aldynda qutqarý bólimsheleri 47 nysandaǵy sý aıdyndarynyń túbin tekserdi.
Óńirdegi eń iri sý aıdyndary – Fedorov jáne Samarqan sý qoımalary, Balqash kóli men Sherýbaı-Nura ózenindegi qaýipsizdikti alty qutqarý bólimshesi qamtamasyz etti. Olardyń quramynda 120 qutqarýshy jumys istep, 34 arnaıy tehnıka jáne 29 júzý quraly paıdalanyldy.
Sonymen qatar maýsym boıy reıdter men profılaktıkalyq is-sharalar ótkizildi. Jyl basynan beri 4 473 reıd uıymdastyrylyp, olardyń qorytyndysy boıynsha 240 adam ákimshilik jaýapkershilikke tartyldy. Ákimshilik quqyq buzýshylyq týraly kodekstiń jekelegen baptary boıynsha salynǵan aıyppuldardyń jalpy somasy 3,9 mln teńgeden asty.
Balalarǵa erekshe kóńil bólindi. Aqparattyq-túsindirý jumystarymen 275 myńnan astam adam qamtyldy. Onyń ishinde 151 myńnan astam oqýshy men 134 myń ata-ana bar. Oblys aýdandarynda sondaı-aq tórt modýldik-karkasty basseın paıdalanylyp, onda balalarǵa júzý jáne sýda qaýipsiz júrip-turýdyń negizgi daǵdylary úıretildi.
Resmı shomylý maýsymynyń aıaqtalýymen qaýip tolyq seıilmeıdi. Óńirde turǵyndar balyq aýlap, demalý úshin baratyn sý aıdyndary áli de bar. Sondyqtan qaýipsizdik talaptary kúz mezgilinde de ózekti: jabdyqtalmaǵan jerlerde sýǵa túspeý, balalardy sý aıdyndarynyń mańynda qaraýsyz qaldyrmaý jáne júzý quraldaryn paıdalaný kezinde saqtyq tanytý qajet.
Buǵan deıin Túrkistan oblysynda jyl basynan beri 29 bala sýǵa ketip, kóz jumǵanyn habarlaǵan bolatynbyz.
