Qaraǵandy oblysynyń statıstıka departamentine jańa basshy taǵaıyndaldy

Qaraǵandy oblysy boıynsha aýmaqtyq statıstıka departamentiniń basshysy bolyp Sáýle Komýtova taǵaıyndaldy. Buǵan deıin ol osy departament basshysynyń orynbasary qyzmetin atqarǵan. Óńirdiń jańa basshysyn ujymǵa Ulttyq statıstıka bıýrosynyń basshysy Maqsat Turlybaev tanystyrdy, dep habarlaıdy Kazinform.

Sáýle Komýtova kásipkerlik jáne menedjment mádenıeti ınstıtýtyn «Ekonomıka jáne menedjment» mamandyǵy boıynsha bitirgen.

Memlekettik qyzmette 18 jyldan astam ýaqyt eńbek etip keledi.

«Búginde bıýro transformatsııa kezeńin ótkerip jatyr. Memleket basshysy atap ótkendeı, biz mańyzdy reformany júzege asyryp, tsıfrlyq tehnologııalarǵa baǵdarlanǵan vedomstvo bolýymyz tıis. Bizdiń aldymyzda statıstıkalyq jáne basqa derekterdi retke keltirý mindeti tur. Osy kórsetkishterdi qalyptastyrýda sizderdiń eńbegińiz ben úlesińiz mańyzdy ról atqarady. Birige otyryp, osy bıik maqsattarymyzǵa qol jetkize alamyz dep senemin», – dedi Maqsat Turlybaev aımaq basshysyn tanystyrý barysynda.

Sáýle Amantaıqyzy eńbek jolyn 1997 jyly Qaraǵandy oblystyq statıstıka basqarmasynyń halyq jáne eńbek statıstıkasy bóliminiń mamany bolyp bastady.

Ári qaraı qurylys jáne ınvestıtsııa statıstıkasy tobynyń meńgerýshisi boldy.

1999-2001 jyldary aqparat-statıstıka ortalyǵynyń óndiristik sala bóliminiń bastyǵy bolyp jumys istedi.

Keıingi jyldary aýmaqtyq statıstıka organynda ártúrli laýazymdarda eńbektendi.

2009 jyldan bastap Qaraǵandy oblysynyń statıstıka bólimi basshysynyń orynbasary qyzmetin atqardy.

«Qazaqstan Respýblıkasynyń Táýelsizdigine 20 jyl» mereıtoı medalimen, «Statıstıka úzdigi» tósbelgisimen marapattalǵan.