Qaraǵandy oblysynyń sport basqarmasyna basshy taǵaıyndaldy
QARAǴANDY. KAZINFORM – Qaraǵandy oblysynyń dene shynyqtyrý jáne sport basqarmasyna ýaqytsha basshy taǵaıyndaldy. Kadrlyq sheshim vedomstvonyń burynǵy basshylyǵyna qatysty qoǵamda rezonans týdyrǵan jaǵdaıdan keıin qabyldandy.
Basqarma basshysynyń mindetin ýaqytsha atqarýshy bolyp Berik Dosymbekov taǵaıyndaldy.
Ol Qaraǵandy oblysynyń dene shynyqtyrý jáne sport salasynda kópjyldyq eńbek tájirıbesi bar maman.
Taǵaıyndalǵanǵa deıin ol Qaraǵandy qalasy ákimdiginiń qurylymyndaǵy dene shynyqtyrý jáne sport sektorynyń meńgerýshisi qyzmetin atqaryp, bul salada on jyldan astam ýaqyt jumys istegen.
Onyń profıldik jáne basqarýshylyq bilimi bar. 2005 jyly D.A. Qonaev atyndaǵy ýnıversıtetti «Quqyq salasyndaǵy aqparattyq júıeler» mamandyǵy boıynsha támamdaǵan. 2007 jyly E.A. Bóketov atyndaǵy Qaraǵandy memlekettik ýnıversıtetinde «Dene shynyqtyrý jáne sport» mamandyǵy boıynsha bakalavr dárejesin alǵan. Al 2019 jyly Qazaqstan Respýblıkasy Prezıdenti janyndaǵy Memlekettik basqarý akademııasyn aıaqtap, «Memlekettik saıasat jáne quqyq» baǵdarlamasy boıynsha memlekettik saıasat jáne quqyq magıstri dárejesine ıe boldy.
Berik Dosymbekovtiń eńbek joly sport salasynda, atap aıtqanda jattyǵý zalynda nusqaýshy bolyp jumys isteýden bastalǵan. Ár jyldary ol kommertsııalyq jáne memlekettik qurylymdarda, sonyń ishinde basqarýshylyq qyzmetterde eńbek etti.
2010 jyldyń qazan aıynan 2020 jyldyń jeltoqsan aıyna deıin Qaraǵandy qalasynyń dene shynyqtyrý jáne sport bólimine qarasty bas maman laýazymyn atqardy.
2021 jyldan beri Qaraǵandy qalasynyń mádenıet, tilderdi damytý, dene shynyqtyrý jáne sport bólimi quramyndaǵy dene shynyqtyrý jáne sport sektorynyń meńgerýshisi qyzmetin atqaryp keldi.
Bul taǵaıyndaý basqarmanyń buryńǵy basshysy Serik Sapıev qoǵamda rezonans týdyrǵan oqıǵadan keıin qyzmetinen ketken soń júzege asyryldy.
Eske salsaq, sport basqarmasynyń jetekshileri janjaldasyp, bul derek boıynsha tekseris júrgizilgen bolatyn.