Qaraǵandy oblysynyń shahtalarynda 8 jylda alǵash ret elektrovozdar jańartylyp jatyr
QARAǴANDY. KAZINFORM — Qaraǵandy oblysynda jer asty kóligin jańartý bastaldy: sońǵy segiz jylda alǵash ret óńir shahtalarynda elektrovozdar aýystyrylyp jatyr. Jańǵyrtý alǵashqy nátıjesin berip úlgerdi — óndiriste tıimdilik artyp, toqtap qalý jaǵdaılary azaıǵan.
Jumysty Qarmet kompanııasy júrgizip jatyr. Kásiporyn eskirgen lokomotıvterdi zamanaýı úlgilerge kezeń-kezeńimen almastyrýǵa kiristi. Jańa tehnıkany engizýdiń pılottyq alańy retinde «Qazaqstan» shahtasy tańdaldy. Munda 2V8-900 markaly elektrovoz paıdalanýǵa berildi.
Kásiporyn qyzmetkerleriniń aıtýynsha, bul — sońǵy jyldardaǵy alǵashqy aýqymdy jańartý.
Shahtalyq elektrovozdar óndiristik úderiste sheshýshi ról atqarady. Jer astynda olar aýyr taý-ken jabdyqtaryn, materıal men jumysshylardy tasymaldaıdy. Olardyń senimdiligi kásiporyn jumysy úzdiksiz júrip turýyna jáne qyzmetkerlerdiń qaýipsizdigine tikeleı áser etedi.
Jańa 2V8-900 elektrovozdary jaqsartylǵan tehnıkalyq sıpattamalarymen erekshelenedi. Olar qýaty joǵary ári ámbebap: bir ózi de, sondaı-aq qosarlanyp ta jumys isteı alady — bul jaǵdaıda eki lokomotıv birtutas mehanızm retinde áreket etedi. Tórt qozǵaltqyshtyń árqaısysy derbes jumys isteıdi, bul tartý kúshin arttyryp, aýyr quramdardy tasymaldaýǵa múmkindik beredi.
— Ónimdilik aıtarlyqtaı artty: burynǵy elektrovozdarymyz bir aýysymda 8 vagonǵa deıin ǵana tasymaldaı alsa, jańa mashınalar 18 vagonǵa deıin jetkize alady, — dep atap ótti «Qazaqstan» shahtasy ýchaskesi bastyǵynyń orynbasary Serik Ramazanov.
Elektrovoz tórt akkýmýlıatorlyq batareıamen jabdyqtalǵan, olar alty saǵattyq aýysym boıy qaıta qýattaýsyz úzdiksiz jumys isteýdi qamtamasyz etedi. Jer asty jaǵdaıynda bul óndiris turaqtylyǵyn aıtarlyqtaı arttyrady.
— Bul elektrovozda parametrlerdi tirkeý modýli ornatylǵan, sondaı-aq barlyq qate men yqtımal aqaýlar kórsetiletin aqparattyq tsıfrlyq tablo bar. Bul qateni, apatty jáne tıisti jóndeý jumystaryn dıagnostıkalaý úderisin jeńildetedi, — dep atap ótti «Qazaqstan» shahtasynyń relsti kólik ýchaskesiniń mehanıgi Ilıas Saıfýtıarov.
Sonymen qatar borttyq kompıýterden derekterdi júktep alyp, keıin taldaý jasaý múmkindigi qarastyrylǵan. Bul tehnıkanyń jaı-kúıin baqylaýdy jeńildetip, qyzmet kórsetý tıimdiligin arttyrady.
Mashınısterdiń qaýipsizdigine de erekshe kóńil bólingen. Elektrovoz kabınalary jabyq úlgide jasalǵan jáne basqarý tek otyrǵan kúıde júzege asatyndaı etip jobalanǵan. Bul óndiristik jaraqat alý qaýpin azaıtyp, eńbek jaǵdaıyn jaqsartady.
«Qazaqstan» shahtasy mamandarynyń baǵalaýynsha, jańa býyn elektrovozdaryn engizý qazirdiń ózinde naqty nátıje berip jatyr: tasymal kólemi ulǵaıyp, jumys senimdiligi artyp, tehnıkalyq aqaýlarǵa baılanysty toqtap qalý qysqarǵan.
Jer asty kóligin jańartý — kompanııanyń óndiristik qýattardy júıeli túrde jańǵyrtýynyń bir bóligi. Negizgi maqsat — taý-ken jumystarynyń tıimdiligi men qaýipsizdigin arttyrý. Bıyl taǵy toǵyz osyndaı tehnıka jetkizý josparlanyp otyr.
