Sarbaz ólimine baılanysty batalon komandıriniń orynbasary 4 jylǵa sottaldy
ASTANA. KAZINFORM — Almaty garnızonynyń áskerı sotynda Taldyqorǵan garnızonyndaǵy áskerı bólimderdiń birinde merzimdi áskerı qyzmet ótkergen sarbazdyń qaza bolý faktisine qatysty qylmystyq isti qaraý aıaqtaldy.
Byltyr 23 qyrkúıekte jeke quramnyń qarýmen jumys isteý barysynda pýlemetten abaısyzda oq atylyp, qatardaǵy jaýynger Seıtqalı Á., mert boldy.
— Іs boıynsha qadaǵalaýdy júrgizý barysynda áskerı prokýrorlar qaıǵyly oqıǵanyń barlyq mán-jaıyn anyqtaýǵa jáne dáleldemelerdi jınaqtaýǵa baǵyttalǵan qajetti tergeý jáne protsestik áreketterdiń tolyq júrgizilýin qamtamasyz etti, — delingen prokýratýranyń habarlamasynda.
Tergep-tekserý barysynda batalon komandıriniń orynbasary qarýdy paıdalaný kezinde qaýipsizdik talaptarynyń saqtalýyn qamtamasyz etpegeni, sondaı-aq aldyńǵy ótkizilgen atystardan keıin qarýdy tolyq tekserýdi uıymdastyrmaǵany anyqtaldy. Sonyń saldarynan uńǵyda qalyp qoıǵan oq áskerı qyzmetshiniń qaza bolýyna sebep boldy.
Sot talqylaýynyń qorytyndysy boıynsha atalǵan laýazymdy tulǵa Qylmystyq kodekstiń 453-babynyń 2-bóligimen (aýyr zardaptarǵa ákep soqqan qyzmetke salǵyrt qaraý) kináli dep tanylyp, 4 jylǵa bas bostandyǵynan aıyrý jazasyna sottaldy.
Úkim zańdy kúshine engen joq.
Al jaqynda Aqtaýdaǵy áskerı bólim komandıriniń salǵyrttyǵynan merzimdi áskerı qyzmetshiniń qaza tabýyna baılanysty qylmystyq is sotqa joldandy.
