Qaraǵandy oblysynyń ózenderinde tórt myń sharshy metr muz jaryldy
QARAǴANDY. KAZINFORM — Óńirde kóktemgi sý tasqyny maýsymy qalypty jaǵdaıda ótip jatyr. Qutqarýshylar táýekelderdiń aldyn alýǵa basymdyq berip, profılaktıkalyq sharalardy kúsheıtti.
Qaraǵandy oblysynda ózenderdegi muz ben qardy qopsytýǵa baǵyttalǵan jarý jumystary jalǵasyp jatyr — bul tasqyn qaýpin azaıtýdyń negizgi sharalarynyń biri. Bul jumysty oblystyq tótenshe jaǵdaılar departamenti qolǵa alǵan.
16 naýryz kúni muz jarý jumysy Buqar jyraý jáne Abaı aýdandarynda ótti: Nura ózeniniń Petrovka jáne Esengeldi aýyldary mańyndaǵy eki ýchaskesinde, sondaı-aq Jastilek aýyly tusyndaǵy Ótkelsiz ózeninde júrgizildi. Jumys Osakarov aýdanynda — Úlken Qundyzdy jáne Sabyrqoja ózenderinde jalǵasty, munda shamamen 2000 sharshy metr aýmaq óńdeldi.
Jalpy eki kún ishinde 4055 sharshy metr aýmaq muzdan tazartyldy. Mundaı sharalar erigen sýdyń ótýin jedeldetýge, jaǵalaýlar men kópirlerge túsetin qysymdy azaıtýǵa jáne tótenshe jaǵdaılar qaýpin tómendetýge múmkindik beredi.
17 naýryzdaǵy jaǵdaı boıynsha óńirdegi tasqyn ahýaly turaqty: turǵyn úılerdi sý basý jáne joldarda sý tasýy tirkelmegen.
Departamenttiń málimetine súıensek, oblysta tasqyn kezeńine daıyndyq aldyn ala júrgizilip, barlyǵy 132-ge jýyq is-shara atqarylypty.
– 25 shaqyrym qorǵanys dambalary nyǵaıtyldy, 21 shaqyrymnan astam arna tazartylyp, salyndy, 28 shaqyrym ózen arnalary sanıtarlyq tazartýdan ótti, 54 jol ýchaskesinde sý ótkizý qabileti arttyrylyp, negizgi gıdrotehnıkalyq qurylystar jóndeldi. 139 eldi meken jáne kólik ınfraqurylymynyń 130-dan astam yqtımal qaýipti ýchaskesi erekshe baqylaýǵa alyndy. Otyn, azyq-túlik, ınertti materıaldar men qap qory jasaqtalyp, sondaı-aq shamamen 3,7 mlrd teńge kóleminde qarjylyq rezerv qalyptastyryldy, – delingen oblystyq tótenshe jaǵdaılar departamentiniń málimetinde.
Ózenderdegi jarý jumystary áli de jalǵasa túsedi. Kelesi kezeń Nura aýdanynda josparlanǵan. Azamattyq qorǵaý kúshteri joǵary daıyndyq rejımine kóshirilip, jedel áreket etý úshin mobıldi toptar qurylǵan.
Buǵan deıin Qaraǵandy oblysynda tasqyn maýsymyna daıyndyq aıasynda jaǵdaıdy 30 gıdrologııalyq beket baqylap otyrǵany habarlanǵan.
