Qaraǵandy oblysynyń Nura aýdanynda 19 mektep dırektory ákimshilik jaýapkershilikke tartyldy
ASTANA. KAZINFORM — Nura aýdanynyń prokýratýrasy aýdandaǵy bilim berý uıymdarynda tekseris júrgizdi. Nátıjesinde sanıtarlyq-epıdemıologııalyq baqylaý, órt qaýipsizdigi jáne densaýlyq saqtaý salalarynda kóptegen zań buzýshylyqtar anyqtaldy. Bul týraly Qaraǵandy oblysynyń prokýratýrasy málim etti.
Tekseris nátıjesinde aýdannyń keıbir mektepterinde jaramdylyq merzimi ótip ketken dárilik quraldar tabylǵan.
«Belgilengen standarttarǵa sáıkes kelmeıtin dezınfektsııalyq eritindiler anyqtaldy. Mektepterdiń birinde ishek taıaqshasy bakterııalary anyqtaldy. Aýdan prokýratýrasynyń qadaǵalaý aktisi negizinde barlyq anyqtalǵan buzýshylyqtar joıyldy», — delingen habarlamada.
Qabyldanǵan sharalardyń nátıjesinde 2000-nan astam kámeletke tolmaǵandardyń quqyqtary qorǵaldy.
Tekserý nátıjesi boıynsha órt qaýipsizdigi talaptaryn buzǵany úshin 19 mektep dırektory ákimshilik jaýapkershilikke, 17 laýazymdy tulǵa tártiptik jaýapkershilikke tartyldy.
