Qaraǵandy oblysynyń mektepterinde jaramdylyq merzimi ótken dári-dármekter saqtalǵan - prokýratýra
QARAǴANDY. KAZINFORM - Qaraǵandy oblysynyń mektepterinde medıtsına salasy boıynsha zańbuzýshylyqtar anyqtaldy, dep habarlaıdy Qaraǵandy oblysy prokýratýrasynyń baspasóz qyzmeti.
Baspasóz qyzmetiniń málimetterine qaraǵanda, prokýrorlyq tekserý barysynda medıtsınalyq qyzmet kórsetpeý, sonymen qatar jaramdylyq merzimi ótken dárilik zattardy saqtaý faktileri anyqtaldy.
2022 jyldan bastap Qaraǵandy qalasynyń mektepterinde 3 myńǵa jýyq oqýshyǵa medıtsınalyq qyzmet kórsetilmegeni anyqtaldy.
Mektepterdiń biriniń medıtsınalyq kabınetinde allergııalyq jáne shok reaktsııasynyń aýyr túrlerinde shuǵyl emdeýdiń bir bóligi retinde qoldanylatyn, jaramdylyq merzimi ótken, «Prednızolon» ampýlalary saqtalǵan.
«Oblystyń basqa mektepterinde jaramdylyq merzimi 5-7 jyl buryn ótip ketken dárilik preparattar tabyldy. Osyǵan qaraı tıisti sharalar qoldanylyp, merzimi ótken dári-dármekter joıyldy, kináli tulǵalar jaýapqa tartylyp, 7000 balanyń quqyǵy qorǵaldy», - delingen habarlamada.
