Qaraǵandy oblysynyń qutqarýshylary ótken táýlikte qar qursaýynan 15 adamdy qutqardy
QARAǴANDY. KAZINFORM – 20 qańtarda Qaraǵandy oblysynyń joldarynda qutqarýshylar qar qursaýynda qalǵan 15 adamdy evakýatsııalady. Olardyń barlyǵy jaqyn mańdaǵy eldi mekenderge jetkizildi, dep habarlaıdy Kazinform tilshisi.
Osakarov aýdanynda, Osakarovka-Molodejnyı avtojolynda, Molodejnyı aýylynan 20 shaqyrym jerde, jol shetine túsip ketken jeńil kólikten úsh adam qutqaryldy. Olar medıtsınalyq kómekti qajet etpedi.
Budan basqa, qutqarýshylar Osakarovkadaǵy jylytý pýnktine 5 jeńil kólikti alyp bardy. Olardyń ishinde 12 adam bolǵan.
– Temirtaýda TJD qyzmetkerleri jergilikti atqarýshy organdarmen jáne «Shańyraq» qozǵalysynyń eriktilerimen birge jol aqysyn tóleý beketinde turyp qalǵan avtokólikterdiń jolaýshylaryna azyq-túlik jetkizdi. Sondaı-aq polıtseıler salonynda 52 adam bolǵan Shymkent-Astana baǵytymen kele jatqan eki avtobýstyń jolaýshylaryn Temirtaýdaǵy jylytý pýnktterine alyp bardy. Jolaýshylardyń eshqaısysy medıtsınalyq kómekti qajet etpedi, - dep habarlady Qaraǵandy oblysynyń TJD baspasóz qyzmeti.
Buqar jyraý aýdanynda, Úshtóbe aýyldyq okrýginde, Atameken aýylynyń mańynda jedel medıtsınalyq járdem brıgadasy shuǵyl aýrýhanaǵa jatqyzýdy qajet etetin naýqasty jetkizýde qıyndyqtarǵa tap boldy. Jedel járdem kóligine áıeldi jol talǵamaıtyn kóliktiń kómegimen jetkizdi.
Qaraǵandy oblysynyń aýmaǵynda daýyldy eskertý jalǵasyp jatyr. Oblystyń kóp bóliginde boran saqtalady. Qutqarýshylar óńir turǵyndaryna kelesi qaýipsizdik erejelerin saqtaýǵa keńes beredi:
– eldi mekenderden tys jerlerge jol júrýden jáne jaıaý júrýden bas tartýǵa;
– trassalar jabylatyn jerlerde kólik quraldarynyń keptelisin boldyrmaý;
– aýa raıynyń qolaısyzdyǵyn jol boıyndaǵy nysandarda kútý;
– TJD resmı paraqshalarynda jáne áleýmettik jelilerde avtojoldardyń jabylýy, qozǵalystyń shektelýi nemese ashylýy týraly aqparatty qadaǵalaý.
Oqıǵalar men TJ týraly 112 telefony boıynsha habarlaý qajet.
Eske salsaq, 20 qańtarda elimizdiń birqatar óńirinde aýa raıynyń qolaısyzdyǵynan joldar jabylǵan bolatyn.