Qaraǵandy oblysynyń qurylys basqarmasynyń basshysy laýazymyna Maqsat Muqashev taǵaıyndaldy
QARAǴANDY. KAZINFORM - Memlekettik qyzmette 15 jylǵa jýyq eńbek ótili bar Maqsat Muqashev buǵan deıin ekonomıkalyq damý jáne kólik salalarynda túrli jaýapty qyzmetter atqarǵan. Onyń eńbek jolyndaǵy negizgi kezeńder Qaraǵandy oblysynyń ákimdigi júıesindegi jumyspen jáne óńirlik kólik ınfraqurylymyna jetekshilik etýmen baılanysty.
Taǵaıyndaý Qazaqstan Respýblıkasy Memlekettik qyzmet isteri agenttigimen kelisildi.
Maqsat Muqashev eńbek jolyn 2011 jyly Qaraǵandy oblysynyń ekonomıka jáne bıýdjettik josparlaý basqarmasynda ekonomıst bolyp bastady. Ár jyldary osy basqarmada bas maman, Qaraǵandy oblysy ákimi apparatynyń uıymdastyrý bóliminde ınspektor, sondaı-aq oblys ákimi apparatynyń ekonomıkalyq damý jáne taldaý bóliminde bas maman qyzmetterin atqardy.
2016-2021 jyldary Qaraǵandy oblysy ákimi apparatynyń ekonomıkalyq damý jáne taldaý bólimin basqardy.
Keıingi jyldary onyń kásibı qyzmeti kólik salasymen baılanysty boldy. Maqsat Muqashev Qaraǵandy oblysynyń jolaýshylar kóligi jáne avtomobıl joldary basqarmasy basshysynyń orynbasary, keıin basqarma basshysy qyzmetterin atqardy.
Jańa basshyny tanystyrǵan Qaraǵandy oblysynyń ákimi Ermaǵanbet Bólekpaev onyń memlekettik organdardaǵy jumys tájirıbesin atap ótip, jańa qyzmetine sáttilik tiledi.
Eske sala keteıik, ótken aptada elimizdiń jergilikti atqarýshy organdarynda birqatar kadrlyq aýys-túıis boldy. Bul rette aýdan ákimderi men basqarma basshylary jańa qyzmetine kiristi.
