Qaraǵandy oblysynyń dıqandary bıyl shamamen 1 mln tonna astyq jınaýdy kózdep otyr

QARAǴANDY. KAZINFORM — Óńirde egin oraǵy bastaldy. Negizgi jumystar 1 qyrkúıekten jappaı júrgizilmek. Ótken jylmen salystyrǵanda ónimdilik tómendegenimen, sharýalar bıylǵy naýqannan shamamen bir mıllıon tonna astyq jınap, tuqym qoryn tolyq qamtamasyz etýdi josparlap otyr. 

Oblystyq aýyl sharýashylyǵy basqarmasynyń málimetinshe, bıyl dándi daqyldar egilgen aýmaqtyń jalpy kólemi 914,7 myń gektardy qurady. Bul kórsetkish ótken jylǵydan sál artyq. Onyń ishinde bıdaı egistigi 779,2 myń gektarǵa jetip, ótken jylǵa qaraǵanda 12,3 myń gektarǵa artqan. Al arpa alqaby 117,3 myń gektarǵa deıin qysqarǵan.

— Ártaraptandyrý aıasynda dándi daqyldar kólemin qysqartý esebinen maıly daqyldar men mal azyǵy alqaby ulǵaıtyldy. Máselen, bıyl maıly daqyldar 78,1 myń gektardan jınalady. Bul ótken jylǵy deńgeıden eki eseden astam joǵary, — dep naqtylady basqarma ókilderi.

Boljam boıynsha, óńirde jalpy 946,1 myń tonna astyq jınalmaq. Onyń ishinde 817 myń tonnasy — bıdaı. Ortasha ónimdilik gektaryna 10,3 tsentner deńgeıinde kútiledi. Al 2024 jyly bul kórsetkish gektaryna 14,5 tsentnerdi quraǵan edi.

Kartop boıynsha 265,2 myń tonna ónim alý josparlanyp otyr. Ortasha túsim — gektaryna 248 tsentner. Kókónis boıynsha kútiletin ónim kólemi — 38,5 myń tonna, ónimdilik gektaryna 379 tsentnerge jetýi tıis. Qazirgi ýaqytta 31 myń gektardan astam alqap orylyp, 27,3 myń tonna astyq bastyryldy.

Egin jınaý naýqanynyń qarqynyn báseńdetpeı júrgizý úshin aýyl sharýashylyǵy taýaryn óndirýshilerge arzandatylǵan dızel otyny bólindi. Onyń kólemi — 19,6 myń tonna, lıtri 250 teńgeden usynylyp otyr.

Ónimdi saqtaýǵa óńir tolyq daıyn. Búginde oblysta syıymdylyǵy 145 myń tonna bolatyn tórt lıtsenzııalanǵan astyq qabyldaý kásiporny, shamamen 1 mln tonnaǵa arnalǵan 590-nan astam qoıma jumys isteıdi. Buǵan qosa, 340 myń tonnaǵa eseptelgen 138 kartop jáne kókónis saqtaý qoımasy bar. Bıyl qosymsha qýattar paıdalanýǵa berildi: 10 myń tonnaǵa arnalǵan astyq qoımasy men 2,5 myń tonnaǵa arnalǵan kókónis qoımasy. Jyl sońyna deıin taǵy 30 myń tonna qosymsha qýat iske qosylmaq.

— Egin oraǵy barysy kúndelikti baqylaýda. Jumystardyń qarqyny men sharýalardy qajetti resýrstarmen qamtamasyz etý máselesin qadaǵalap otyrmyz, — dedi oblystyq aýyl sharýashylyǵy basqarmasynda.

Osyǵan deıin Úkimet elimizdegi egin alqabynyń 10,7% jınalǵany jaıly habarlaǵan bolatyn.