Qaraǵandy oblysynyń dene shynyqtyrý jáne sport basqarmasyna jańa basshy taǵaıyndaldy
ASTANA. KAZINFORM — Týrızm jáne sport mınıstrligi Qaraǵandy oblysynyń dene shynyqtyrý jáne sport basqarmasynyń basshylyǵyna úmitkerdiń kandıdatýrasyna kelisim berdi.
Týrızm jáne sport mınıstrligi janyndaǵy óńirlik sport basqarmalarynyń basshylaryn taǵaıyndaý jónindegi komıssııanyń kezekti otyrysy ótti.
Jıynda Qaraǵandy oblysynyń dene shynyqtyrý jáne sport basqarmasynyń basshysy laýazymyna usynylǵan kandıdatýra qaraldy.
Talqylaý qorytyndysy boıynsha komıssııa músheleri Almaty oblysynyń olımpıadalyq rezerv daıarlaý ortalyǵynyń basshysy Nurken Nuratovtyń kandıdatýrasyn maquldady.
Úmitkerdiń sport salasyndaǵy kásibı tájirıbesi, basqarýshylyq qabileti jáne óńir sportyn damytýǵa qatysty ustanymy komıssııa tarapynan jan-jaqty zerdelenip, oń sheshim qabyldandy.
Kandıdattardy jergilikti atqarýshy organdar usynady, al taǵaıyndaý tek QR Týrızm jáne sport mınıstrligi janyndaǵy komıssııanyń maquldaýynan keıin júzege asyrylady.
Eńbek jolyn 2007 jyly bastaǵan. Ár jyldary dzıýdo boıynsha jattyqtyrýshy, Ortalyq sport klýbynyń sport komıteti fılıalynda jattyqtyrýshy-oqytýshy, sondaı-aq №9 balalar-jasóspirimder sport mektebinde stendtik atý boıynsha jattyqtyrýshy jáne Astana qalasy Týrızm, dene shynyqtyrý jáne sport basqarmasyna qarasty gandbol klýbynda jattyqtyrýshy qyzmetterin atqarǵan.
Keıin basshylyq qyzmetter atqarǵan: Almaty oblysyndaǵy «Jetisý-Suńqar» kásibı fýtbol klýby dırektorynyń orynbasary, Qapshaǵaı qalasyndaǵy oblystyq balalar-jasóspirimder sport mektebiniń dırektory, sondaı-aq oblystyq joǵary sport sheberligi mektebiniń basshysy qyzmetterin atqardy.
Qaraǵandy oblysyna taǵaıyndalǵanǵa deıin Almaty oblysynyń Olımpıadalyq rezervterdi daıarlaý ortalyǵyn basqardy.
Nurken Nuratov Qazaq sport jáne týrızm akademııasyn «dene shynyqtyrý jáne sport» mamandyǵy boıynsha támamdap, osy baǵytta pedagogıka ǵylymdarynyń magıstri dárejesin alǵan.
Aıta ketelik Qaraǵandyda Serik Sápıevke qatysty janjal boıynsha tergeý júrgeni týraly jazǵan edik. Keıin Qaraǵandy oblysynyń sport basqarmasyndaǵy janjalǵa qatysty tekseris bastalǵan edi. Serik Sápıev Qaraǵandydaǵy rezonansty oqıǵadan keıin qyzmetinen ketken edi.
Keıin Serik Sápıev orynbasarymen bolǵan janjalǵa núkte qoıǵan edi.
Eske salsaq, Kazinform agenttigi jańa «Derekqor» jobasyn iske qosty.
