Qaraǵandy oblysynyń birqatar aımaǵynda bıznes úshin elektr energııasyna tarıfter tómendedi

QARAǴANDY. KAZINFORM – Shahtınsk qalasy, Abaı men Buqar jyraý aýdandarynda qyzmet kórsetetin «Raschetnyı servısnyı tsentr» JShS QR UEM Tabıǵı monopolııalardy retteý komıtetiniń Qaraǵandy oblysy boıynsha departamentine zańdy tulǵalar úshin elektr energııasyna tarıfti 1 kVt/saǵatyna 45,85 teńgeden 41,26 teńgege deıin ıaǵnı 10%-ǵa tómendetý týraly habarlama berdi.

Osyndaı habarlamany Saran qalasyna qyzmet kórsetetin «Energoýgol HHІ» JShS de berdi, ol 1 kVt/saǵatyna 47,90 teńgeden 43,13 teńgege deıin 10%-ǵa tómendetti.

Tómendetilgen tarıfter 2024 jylǵy 22 mamyrdan bastap qoldanysqa engiziledi.

Tarıfti tómendetý QR UEM TMRK aýmaqtyq departamentteri rettelmeıtin energııamen jabdyqtaýshy uıymdardy elektr energııasymen jabdyqtaý jónindegi qyzmetterge lıtsenzııalardyń qoldanylýyn jaqynda toqtatqannan keıin múmkin boldy.

Eske sala keteıik, bul jumysty Úkimet Memleket basshysynyń deldal uıymdardy, onyń ishinde tutynýshylardy elektrmen jabdyqtaý tizbegindegi ónimsiz deldaldardy joıý jónindegi tapsyrmasy aıasynda júrgizdi.

Tarıfti tómendetýdiń alǵysharty tutynýshylardyń (qalanyń zańdy tulǵalary men bıýdjettik uıymdarynyń) rettelmeıtin energııamen jabdyqtaýshy uıymdardan elektr energııasyn kepildi jetkizýshige («Raschetnyı servısnyı tsentr» JShS jáne «Energoýgol HHІ» JShS) aýysýynan keıin boldy, bul kepildi jetkizýshiniń kórsetiletin qyzmetteriniń kólemin ulǵaıtý jaǵyna, tıisinshe tarıfti tómendetýge áser etti.

Elektr energııasy qyzmetterin úzdiksiz alý úshin buryn rettelmeıtin jetkizýshilerdi paıdalanǵan Shahtınsk qalasynyń, Abaı jáne Buqar jyraý aýdandarynyń zańdy tulǵalarynyń «Raschetnyı servısnyı tsentr» JShS-men jedel túrde tıisti sharttar jasasý múmkindigi bar.

Saran qalasynyń zańdy tulǵalarynyń «Energoýgol HHІ» JShS-men sol sııaqty tıisti sharttar jasasý múmkindigi bar.

Týyndaǵan suraqtar boıynsha «Raschetnyı servısnyı tsentr» JShS-na júginýge bolady.