Qaraǵandy oblysynyń bes óńirine jylý berildi
QARAǴANDY. KAZINFORM - Qaraǵandy oblysynda jylý berý maýsymy bastaldy. 2 qazandaǵy jaǵdaı boıynsha 756 áleýmettik sala nysany men 1661 kóppáterli turǵyn úı jylýǵa qosyldy.
Qaraǵandy oblysynyń energetıka jáne turǵyn úı-kommýnaldyq sharýashylyq basqarmasynyń málimetinshe, Temirtaý, Saran qalalarynda, Buqar jyraý, Qarqaraly jáne Nura aýdandarynda jylý berile bastalǵan.
— Jylý berý kezeń-kezeńimen júrgizilip jatyr. Osy ýaqytta oblystyń bes óńiride jylý berildi, qalǵan aýmaqtarda bul jumys 1-10 qazan aralyǵynda júredi. Prıozersk qalasynda, sondaı-aq Aqtoǵaı aýdanyndaǵy Shashýbaı jáne Saryshaǵan kentterinde jylý berý maýsymyn 10 qazannan bastaý josparlanyp otyr, - dep habarlady basqarmada.
Jalpy óńirde 6105 kóppáterli turǵyn úı jáne 1116 áleýmettik nysan bar. Qazirgi ýaqytta turǵyn úılerdiń 27,2%-y jáne áleýmettik nysandardyń 67,7%-y jylýmen qamtyldy.
Sonymen qatar energııa kózderindegi jabdyqtardy jóndeý jumystary da júrip jatyr. Bıyl jóndelýi tıis 37 qazandyqtyń 29-ynda, 27 týrbınanyń 20-synda jumys aıaqtalǵan. Qazir alty qazandyq pen úsh týrbına jóndelip jatyr.
Qysqa daıyndyq aıasyndaǵy taǵy bir mańyzdy másele — kómir qory. Búgingi tańda 622,3 myń tonna kómir, ıaǵnı jalpy qajettiliktiń 58,3%-y daıyndaldy. Onyń 385,3 myń tonnasy halyqqa arnalǵan, bul qajetti kólemniń 47,9 paıyzy.
Jylý berý maýsymyna óńirdiń kómirge degen jalpy qajettiligi 1 mln 66,9 myń tonnany quraıdy. Onyń ishinde kommýnaldyq-turmystyq qajettilikterge 237 myń tonna kómir daıyndalǵan. Bul qajetti kólemniń 90,1%-yna teń.
Basqarma málimetinshe, barlyq stantsııa kómir jetkizýge kelisimshart jasasqan. Kúzgi-qysqy kezeńde óńirge 6,7 mln tonnadan astam otyn jetkizý josparlanyp otyr.
Oblystyń qalalary men aýdandarynda jylý berý jumystary áli júrip jatyr.
Buǵan deıin Qaraǵandy oblysynda kómir satatyn 47 oryn anyqtalǵany habarlanǵan bolatyn.
