Qaraǵandy oblysynyń Aqtoǵaı aýdanynda myń gektar aýmaqty órt sharpydy
QARAǴANDY. KAZINFORM — Qaraǵandy oblysynda tabıǵı órtpen kúres jalǵasyp jatyr. Qyzyl jalyn eldi mekenderge qaýip tóndirmegenimen, órtti aýyzdyqtaýǵa 140 adam men 24 tehnıka jumyldyryldy.
Qaraǵandy oblysynyń Aqtoǵaı aýdanynda, Kejek aýyldyq okrýginiń aýmaǵynda tabıǵı órtti sóndirý jumystary jalǵasýda. Órt Aqshı aýylynan ońtústik-batysqa qaraı 40 shaqyrym jerde ornalasqan taýly aımaqta jáne Aqtoǵaı ormandar men janýarlar dúnıesin qorǵaý sharýashylyǵynyń aýmaǵynda shyqqan.
Aldyn ala málimet boıynsha, tilsiz jaý 1090 gektar jerdi sharpyǵan. Onyń shamamen 1000 gektary memlekettik orman qorynyń aýmaǵyna tıesili.
Qazirgi ýaqytta órtti oqshaýlaý jáne tolyq sóndirý jumystary júrgizilip jatyr. Oqıǵa ornyna Qaraǵandy oblysy Tótenshe jaǵdaılar departamentiniń, jergilikti atqarýshy organdar men orman sharýashylyǵy mekemeleriniń kúshteri men tehnıkasy jumyldyrylǵan.
Jalpy órtti sóndirýge 140 adam men 24 tehnıka tartyldy. Onyń ishinde TJD-dan 42 adam men 7 tehnıka, jergilikti atqarýshy organdardan 78 adam men 13 tehnıka, orman sharýashylyǵy mekemelerinen 20 adam men 4 tehnıka jumys istep jatyr.
Quzyrly organdardyń málimetinshe, qazirgi tańda eldi mekenderge qaýip joq. Jaǵdaı Qaraǵandy oblysy Tótenshe jaǵdaılar departamentiniń baqylaýynda.
Osyǵan deıin Qaraǵandy oblysynyń Qarqaraly aýdanynda Jańatoǵan aýyly mańynda qurǵaq ósimdikterdiń janýyn sóndirý jumystary jalǵasyp jatqanyn habarlaǵan bolatynbyz.
