Qaraǵandy oblysynyń 9 eldi mekeninde brýtsellez anyqtaldy
QARAǴANDY. KAZINFORM - Qaraǵandy oblysynda bes aýdannyń 9 eldi mekeninde brýtsellez oshaqtary tabyldy. Bul aýyldarda karantın engizildi, dep habarlaıdy Kazinform agenttiginiń tilshisi.
Aýdandardyń bas memlekettik veterınarııalyq-sanıtarııalyq ınspektorlarynyń usynysy negizinde oshaqtar aýmaǵynda 23 mamyrdan bastap brýtsellez boıynsha shekteý is-sharalary belgilendi.
«Qaraǵandy oblysyndaǵy 5 aýdannyń 9 eldi mekeninde: Abaı aýdany, Qurma a/o; Qarqaraly aýdany, M. Mamyraev a/o, Temirshy a/o; Nura aýdany, Tassýat a/o; Kóktinkól a/o; Shet aýdany, Nurataldy, Shet, Bosaǵaa a/o; Osakarov aýdany, Batpaq a/o aýrý janýarlar anyqtaldy. Barlyǵy 18 bas iri qara. Brýtsellez boıynsha shekteý is-sharalary barlyq iri qara mal basyna qatarynan eki teris PTR nátıje alǵanǵa deıin jáne janýarlardyń basqa túrlerinde teris PTR nátıjeler alynǵanǵa deıin, sondaı-aq qorytyndy dezınfektsııa sapasynyń nátıjelerine sáıkes júrgiziledi. Dertke shaldyqqan maldyń eti tutynýshylarǵa jetpeıdi. Barlyǵy baqylaýda», - dedi QR AShM Veterınarııalyq baqylaý jáne qadaǵalaý komıtetiniń Qaraǵandy oblystyq aýmaqtyq ınspektsııasynyń basshysy Erjan Beketbaev.
Sondaı-aq, oblystyń bas veterınarynyń aıtýynsha, shekteýler qoıylǵan aýmaqtarda QR AShM VBQK «Respýblıkalyq epızootııaǵa qarsy jasaq» RMM mamandary saýyqtyrý is-sharalaryn júrgizýde.
Veterınarlardyń habarlaýynsha, brýtsellezdi juqtyrýdyń sebebi aýrýdyń sozylmaly aǵymy, aýrý maldardy ýaqtyly oqshaýlamaý, aýrý maldyń tólin sanıtarlyq soıýǵa bermeý, janýarlardy veterınarııalyq qyzmetke ákelý nemese satý kezinde janýarlardyń ıeleri dert jaıly ýaqtyly habardar etpeýi, kóktemde jáne kúzde janýarlardy jaıý jáne jaıylym kezinde qoralarda dezınfektsııalyq jumystardy júrgizbeý bolyp tabylady. Ádette, janýarlarǵa profılaktıkalyq vaktsınatsııa salynbaıdy. Sondyqtan maldy dertten saqtaýdyń jalǵyz joly – erejelerdi saqtaý bolyp tabylady.
