Qaraǵandy oblysynyń 40-qa jýyq medıtsına qyzmetkeri alaıaqtyq jasaǵan

ASTANA. KAZINFORM – Qaraǵandy oblysy boıynsha Medıtsınalyq jáne farmatsevtıkalyq baqylaý departamenti biliktilik testileý nátıjelerin qoldan jasaýdyń birqatar faktilerin anyqtady. Jalaqyǵa ústemeaqy alý úshin 30-dan astam medbıke men 7 dáriger alaıaqtyqqa barǵan.

Іshki taldaý barysynda Qaraǵandy oblysynyń medıtsınalyq jáne farmatsevtıkalyq baqylaý departamentiniń qyzmetkerleri derekterdiń burmalanǵanyn anyqtady.

Vedomstvonyń málimetinshe, test tapsyrǵanyn rastaıtyn qujatty alý úshin dárigerler men medbıkeler 200 myńnan 300 myń teńgege deıingi soma tólegen. «Kómekshiler» test tapsyrǵandardyń jeke kýálikteriniń nómirlerin derekter bazasyna engizgen. Sodan keıin olardyń aty-jónin jáne basqa da málimetterin ózgertken. 

Alaıda arnaıy baǵdarlama nátıjelerdiń jalǵan ekenin kórsetken. 39 quqyq buzýshynyń ekeýi Ulytaý oblysynyń densaýlyq saqtaý júıesinde jumys isteıdi. Medıtsına qyzmetkerlerine qatysty ákimshilik materıaldar tirkelip, dárigerlerge aıyppul salyndy.

- Bul áreket júıeni aldaý bolyp sanalady. Biz bul sertıfıkattardy resmı túrde toqtattyq. Osy adamdarǵa qatysty Ákimshilik quqyq buzýshylyq týraly kodekstiń 432-babynyń 1-bóligi boıynsha ákimshilik sharalar qabyldandy. Bul tulǵalar kinásin moıyndap, aıyppul tóledi.

Qazirgi ýaqytta departament quqyq qorǵaý organdaryna alaıaqtyq faktisi boıynsha is qozǵaý úshin qujattar jınaqatap jatyr, - dep habarlady Qaraǵandy oblysy boıynsha Medıtsınalyq jáne farmatsevtıkalyq baqylaý departamentiniń basshysy Olga Smırnova.

Eske salsaq, Densaýlyq saqtaý mınıstri Aqmaral Álnazarova ótken jyldyń sońynda medıtsınalyq uıymdardyń kredıtorlyq bereshegi 44%-ǵa, al merzimi ótken bereshek 19%-ǵa tómendegeni jaıly aıtqan bolatyn.