Qaraǵandy oblysyndaǵy trassalarda eń qaýipti jeti ýchaske anyqtaldy
QARAǴANDY. KAZINFORM — Mamandar respýblıkalyq jáne oblystyq joldardy zerdelep, eń qaýipti baǵyttardy belgiledi.
Osy ýchaskelerde qysqy kezeńde qaýipsizdikti arttyrý maqsatynda qosymsha eskertý quraldaryn ornatý jáne jańa tehnologııalyq sheshimderdi engizý bastaldy.
Qaraǵandy oblysynda Polıtsııa departamentiniń mamandary «QazAvtoJol» qyzmetkerlerimen birlesip, respýblıkalyq jáne oblystyq avtojoldardyń jaı-kúıine keshendi tekseris júrgizdi.
Negizgi mindet — joldardyń tehnıkalyq talaptarǵa sáıkestigin baǵalaý, qys maýsymyna daıyndyǵyn tekserý, sondaı-aq aýa raıy nasharlaǵan jaǵdaıda joldardy ýaqytyly tazalaý jáne qajet bolsa jabý sharalaryn baqylaý boldy.
Taldaý qorytyndysy boıynsha, oblys aýmaǵynan ótetin respýblıkalyq mańyzy bar jeti ýchaskede jol-kólik oqıǵalary turaqty túrde tirkeletini anyqtaldy. Osy aralyqtarda qosymsha eskertý belgilerin ornatý jáne jańa tehnıkalyq sheshimderdi qoldaný bastaldy.
Osyndaı elementterdiń biri — Qaraǵandy–Qarqaraly trassasynyń jıegine jaǵylǵan qyzyl sıgnal jolaǵy. Dál osy jerde buǵan deıin bes adamnyń ómirin qıǵan aýyr jol apaty tirkelgen edi. Jolaq qarańǵy ýaqytta jaqsy kórinedi jáne qar basqanda da anyq baıqalady.
Mamandardyń málimetinshe, ony engizgennen keıin bul ýchaskede jol-kólik oqıǵalary tirkelmegen.
Qysqy kezeńde qozǵalys qaýipsizdigin qamtamasyz etýge erekshe nazar aýdarylyp otyr.
Respýblıkalyq trassalarda júrgizýshilerdi aqparattandyrý úshin iri elektrondy ekrandar ornatylǵan. Olar oblystyń ár óńirindegi aýa raıy jaǵdaıyn kórsetedi. Eger bir baǵytta jol jabylsa, keptelisterdiń aldyn alý jáne qaýipsizdikti qamtamasyz etý úshin kórshiles ýchaskelerde de qozǵalys shektelýi múmkin.
Budan bólek, birqatar trassada aýa raıyna baılanysty jyldamdyq rejımin avtomatty túrde retteıtin elektrondy belgiler engizilgen. Kóriný shektelgende nemese kóktaıǵaq kezinde ruqsat etilgen jyldamdyq rejımi 140 km/saǵ jyldamdyqtan 80–60 km/saǵ deıin tómendeıdi. Bul jol apattarynyń aldyn alýǵa yqpal etýi tıis.
Mamandardyń aıtýynsha, joldardy tekserý jáne profılaktıkalyq sharalardy júrgizý jumystary aldaǵy ýaqytta da jalǵasyn tabady.
Budan buryn Qaraǵandy oblysynda jeti adamnyń ómirin qıǵan jol apatyna kináli júrgizýshige sot úkimi shyqqanyn jazdyq.