Qaraǵandy oblysyndaǵy respýblıkalyq joldyń 34 shaqyrymy jańartylyp jatyr
QARAǴANDY. KAZINFORM – Qaraǵandy oblysynda respýblıkalyq mańyzy bar «Qalqaman – Baıanaýyl – Úmitker – Botaqara» avtomobıl jolynyń 231-265,6 shaqyrym aralyǵynda ortasha jóndeý jumystary jalǵasyp jatyr.
Joba aıasynda jol ınfraqurylymyn jańǵyrtý jáne kólik qozǵalysynyń qaýipsizdigin arttyrýǵa baǵyttalǵan birqatar jumys atqaryldy.
QazAvtoJol mamandarynyń málimetinshe, búginde jol jabynyndaǵy 2 813 sharshy metr aqaý joıylǵan.
Sonymen qatar 20 shaqyrym jolda asfaltbeton jabynyn joný jumystary júrgizildi.
– Jańa materıal qosý arqyly sýyq joný ádisimen jol negizin nyǵaıtý jumystary 18 shaqyrym ýchaskede oryndaldy, – delingen habarlamada.
Sondaı-aq iri túıirshikti asfaltbetonnan tómengi jabyn qabatynyń 15,1 shaqyrymy tóseldi.
Jaýapty mamandardyń aıtýynsha, ortasha jóndeý jumystary aıaqtalǵannan keıin jol jabynynyń sapasy jaqsaryp, qozǵalys qaýipsizdigi men júrgizýshiler úshin jaılylyq deńgeıi artady.
Aıta keteıik, Aqtóbe – Ulǵaısyn avtojolyndaǵy jóndeý jumystary 2028 jyldyń sońynda aıaqtalady.
