Qaraǵandy oblysyndaǵy ózende 15 jastaǵy qyz bala sýǵa batyp ketti
QARAǴANDY. KAZINFORM - Qaraǵandy oblysy Buqar jyraý aýdany Kókpekti aýylynda sý aıdynynda qaıǵyly oqıǵa bolyp, kámeletke tolmaǵan qyz bala kóz jumdy.
Aldyn ala málimet boıynsha, bir top jasóspirim eresekterdiń qaraýynsyz ózen jaǵasynda bolǵan jáne tyıym salynǵanyna qaramastan sýǵa túsken.
Oqıǵa ornyna kelgen qutqarýshylar shamamen 4 metr tereńdikte, jaǵadan 20 metr qashyqtyqta qyz balanyń denesin tapty.
Aıta keteıik, atalǵan ýchaskede shomylýǵa tyıym salatyn belgi 2 maýsym kúni ornatylǵan. Sondaı-aq jazǵy demalys bastalar aldynda mektepterde oqýshylarmen sýdaǵy qaýipsizdik erejeleri boıynsha profılaktıkalyq túsindirý jumystary júrgizilgen.
Mamandar qarapaıym qaýipsizdik talaptaryn saqtaýdyń mańyzyn eske salady: tyıym salynǵan jerlerde shomylmaý, balalardy sý jaǵasynda qaraýsyz qaldyrmaý jáne eskertý belgilerine nazar aýdarý qajet.
Mundaı qaıǵyly jaǵdaılardyń basym bóligi sýdaǵy qaýipsizdik erejelerin buzý saldarynan oryn alatyny atap ótiledi.
Eske salaıyq, Aqmola oblysynyń sý aıdyndarynda bir kúnde balalarǵa qatysty eki oqıǵa tirkelip, sonyń birinde kámeletke tolmaǵan bala qaza tapqan bolatyn.
