Qaraǵandy oblysyndaǵy qoımalarda jalpy kartop qory 60 myń tonnadan asady
QARAǴANDY. KAZINFORM — Qaraǵandy oblysynda kartop baǵasyn turaqtandyrý jáne áleýmettik mańyzy bar ónimder baǵasynyń ósýine jol bermeý úshin sharalar qabyldanýda.
Oblys ákimi Ermaǵanbet Bólekpaev aýyl sharýashylyǵy qurylymdarymen belgilengen baǵamen saýda oryndaryna kartop jetkizýge kepildik beretin memorandýmdar jasasýdy tapsyrdy. Sondaı-aq, kóterińki ústeme baǵa qoıýdyń jolyn kesý úshin áleýmettik mańyzy bar taýarlar baǵasyna monıtorıng júrgizýdi jalǵastyrý kerek.
Oblystyń aýyl sharýashylyǵy kásiporyndarynyń qoımalarynda 53 myń tonna kartop saqtalýda, al turaqtandyrý qory men saýda jelilerin qosa alǵanda, jalpy qor 61,6 myń tonnany quraıdy — bul halyqtyń maýsymaralyq qajettilikterin jabý úshin jetkilikti.
Qazirgi ýaqytta forvardtyq kelisimsharttar boıynsha 3,2 myń tonna kartop, sondaı-aq basqa da kókónisterdiń qajetti mólsheri jetkizildi, bul óńirdiń maýsymaralyq qajettiligin tolyǵymen jabady. Aınalym shemasy boıynsha da jetkizý jalǵasýda.
— Oblystyń saýda jáne tutynýshylardyń quqyqtaryn qorǵaý departamenti men Qaraǵandy ákimdigi áleýmettik mańyzy bar azyq-túlik taýarlaryna, sonyń ishinde kartopqa saýda ústemesiniń 15%-dan asýyna jol bermeý úshin saýda jelileriniń ókilderimen kezdesý ótkizdi. Búgingi tańda eki kásipker kartoptyń saýda ústemesin asyra paıdalanǵany úshin ákimshilik jaýapkershilikke tartyldy. Taǵy bir saýda núktesine qatysty tekserý belgilendi, — dep málimdedi oblystyq ákimdikte.
Ekonomıkalyq tergeý departamentine saýda ústeme baǵasyn saqtamaý faktilerin zertteý tapsyryldy. Barlyq buzýshylyqtar boıynsha sharalar qabyldanady.
Oblysta turǵyndardyń qajettilikterin qamtamasyz etý úshin birinshi kezekte qajetti taýarlar qory jetkilikti, al baǵalardy turaqtandyrý jónindegi jumys jalǵasatyn bolady.
Aıta keteıik, Májilis depýtaty Aıdarbek Qojanazarov elde kartop baǵasynyń kúrt ósýin Úkimettiń byltyrǵy qatelikterimen baılanystyrǵan bolatyn.
Osyǵan deıin aýyl sharýashylyǵy mınıstrligi kartop baǵasynyń ósýine esh negiz joq dep málimdegen edi.
Sonymen qatar, kartop baǵasyn turaqtandyrý barysynda 49 zań buzýshylyq anyqtalǵany belgili boldy.