Qaraǵandy oblysyndaǵy kásiporynǵa 8,65 mln teńge aıyppul salyndy
QARAǴANDY. KAZINFORM — Qaraǵandy oblysyndaǵy «Qaraǵaıly» baıytý fabrıkasynda júrgizilgen tekserý barysynda ekologııalyq zańnama talaptarynyń birneshe baǵyt boıynsha buzylǵany anyqtaldy. Kásiporynǵa anyqtalǵan kemshilikterdi joıý týraly nusqama berilip, onyń oryndalýy baqylaýǵa alyndy.
Qaraǵandy oblysynyń Ekologııa departamenti «Qazaqmys» korporatsııasy» JShS-niń «Qaraǵaıly» baıytý fabrıkasyna josparly tekserý júrgizdi.
Tekserý barysynda mamandar atmosferalyq aýany qorǵaý, qaldyqtardy basqarý jáne óndiristik qyzmet salalaryndaǵy talaptardyń buzylǵanyn anyqtady.
Tekserý qorytyndysy boıynsha kásiporynǵa qatysty ákimshilik sharalar qabyldandy. Salynǵan aıyppuldardyń jalpy kólemi 2 myń AEK-ti, ıaǵnı 8 mln 650 myń teńgeni qurady.
Aıyppul qysqartylǵan tártippen tólengen jaǵdaıda onyń mólsheri 4 mln 325 myń teńgeni quraıdy. Sonymen qatar kásiporynǵa anyqtalǵan zań buzýshylyqtardy joıý týraly nusqama berildi. Ekologııa departamenti nusqamanyń oryndalýyn baqylaýdy jalǵastyrady.
Buǵan deıin Qaraǵandydaǵy aeratsııa stantsııasynda tazartylǵan aǵyndy sýlar quramyndaǵy lastaýshy zattardyń ruqsat etilgen kontsentratsııadan asyp ketkeni anyqtalyp, jospardan tys tekserý qorytyndysy boıynsha kásiporynǵa 10 mln teńgege jýyq aıyppul salynǵanyn habarlaǵan bolatynbyz.
