Qaraǵandy oblysyndaǵy kásiporynǵa 2,6 mln teńge aıyppul salyndy
QARAǴANDY. KAZINFORM — Qaraǵandy oblysynda turǵyndardyń ótinishi negizinde júrgizilgen ónerkásiptik kásiporynǵa qatysty jospardan tys tekserý aıaqtaldy.
Shamamen bir aıǵa sozylǵan baqylaý barysynda ekologııalyq zańbuzýshylyqtar anyqtalyp, onyń sońy ákimshilik jaýapkershilikke ákeldi.
Qaraǵandy oblysy boıynsha Ekologııa departamenti 2025 jylǵy 25 qarashadan 23 jeltoqsanǵa deıin «NOVA TsINK» JShS-ne qatysty jospardan tys tekserý júrgizdi. Baqylaý sharalaryna azamattyń ótinishi negiz bolǵan.
Kásiporyn Shet aýdanyndaǵy Aqjal polımetall ken ornyn ıgerip, eki óndiristik alańda qyzmet atqarady. Aqjal kenishinde qorǵasyn-myrysh kenin óndirý jáne óńdeý júzege asyrylsa, Aǵadyr kentindegi aýystyryp tıeý bazasynda daıyn ónimdi jóneltý jáne óndiristik protsesterdi qamtamasyz etý jumystary júrgiziledi.
Tekserý belgilengen tártipke sáıkes ótkizilip, ekologııalyq talaptardyń saqtalýyn baǵalaýǵa baǵyttaldy. Baqylaý barysynda departament mamandary buryn berilgen ekologııalyq qorytyndyda kózdelgen talaptardyń saqtalmaǵanyn anyqtady.
Sonymen qatar zerthanalyq taldaýlar topyraqtaǵy lastaýshy zattardyń ruqsat etilgen mólsherden asqanyn kórsetti.
Tekserý qorytyndysy boıynsha kásiporyn ákimshilik jaýapkershilikke tartyldy. «NOVA TsINK» JShS-ne jalpy somasy 2,6 mıllıon teńgeden asatyn aıyppul salyndy, sondaı-aq anyqtalǵan zańbuzýshylyqtardy mindetti túrde joıý týraly nusqama berildi.
Ekologııa departamentinde jospardan tys tekserýler ekologııalyq táýekelderdiń aldyn alý, qorshaǵan ortany qorǵaý jáne halyqtyń qaýipsizdigin qamtamasyz etý maqsatynda júrgiziletinin atap ótti.
Buǵan deıin Rıdder qalasynda jospardan tys ekologııalyq tekserýlerdiń qorytyndysy boıynsha taý-ken baıytý kesheninde topyraqtyń lastanýy jáne tabıǵatty qorǵaý talaptarynyń saqtalmaý faktileri tirkelgeni habarlandy.