Qaraǵandydaǵy karerlerdiń 75%-nyń júk kólikteri salmaq baqylaýynsyz jolǵa jiberiletini anyqtaldy
QARAǴANDY. KAZINFORM — Qaraǵandy oblysynda aýyr júk kólikterimen joldardy buzyp jatqan jer qoınaýyn paıdalanýshylarǵa baqylaý kúsheıtilip jatyr. Tekserýler kórsetkendeı, karerlerdiń basym bóligi áli kúnge deıin salmaq ólsheıtin jabdyqsyz jumys isteıdi, al shamadan tys júk tıelgen kólikter tasjoldarǵa aıtarlyqtaı zııan keltirip otyr.
Másele avtomobıl joldarynyń jaı-kúıi men salmaqtyq shekteýlerdiń saqtalýyna arnalǵan arnaıy keńeste talqylandy. Óńirde karerlerden shyǵatyn aýyr tehnıkalardyń ruqsat etilgen júktemeden artyq salmaqpen qozǵalý derekteri jıilegen. Sonyń saldarynan jol jabyny búlinip, jóndeý shyǵyndary jyl saıyn artyp keledi.
Kásipkerlik jáne ónerkásip basqarmasynyń basshysy Asqar Ǵazalıevtiń málimetinshe, Qaraǵandy oblysynda keń taralǵan paıdaly qazbalardy óndirýmen shamamen 60 kompanııa aınalysady. Qazir óńirde jer qoınaýyn paıdalanýshylardy pasporttaý júrgizilip, salmaqtyq baqylaý júıeleriniń bar-joǵy tekserilýde.
Anyqtalǵandaı, karerlerdiń 75%-ynda salmaq ólsheıtin jabdyq múlde joq.
— Qazirgi ýaqytta basqarma tarapynan jer qoınaýyn paıdalanýshylardyń lıtsenzııalyq-kelisimsharttyq talaptardy oryndaýyna monıtorıng júrgizilýde. Onyń barysynda salmaqtyq shekteýlerdi saqtaý bóligindegi adaldyq ta eskeriledi. Búginde lıtsenzııalyq-kelisimsharttyq talaptardy buzǵan toǵyz jer qoınaýyn paıdalanýshyǵa habarlama joldandy. Atap aıtqanda, olar taratý qoryn qamtamasyz etpegen jáne esep tapsyrmaǵan. Olardyń jeteýinde salmaq ólsheıtin jabdyqtyń joq ekenin atap ótken jón. Osyǵan baılanysty kelisimsharttardy buzý jáne lıtsenzııalardy qaıtaryp alý máselesi pysyqtalyp jatyr, — dedi Asqar Ǵazalıev.
Onyń aıtýynsha, zań buzýshylardy anyqtaý jumystary ýákiletti organdarmen birlesip jalǵasady. Ásirese salmaq-gabarıttik baqylaý talaptaryn elemeı, joldardy zań buza otyryp paıdalanatyn kompanııalarǵa erekshe nazar aýdarylmaq.
Qazirdiń ózinde narazylyq týyndaǵan kásiporyndar qatarynda «Tegız Jol», GMK KZ, «Sıne Mıdas Stroı» BK, «MAT-Saryarqa», «KamKar», «Atlant 2020» jáne «ǴIMARAT-M» kásiporyndary ataldy.
Jer qoınaýyn paıdalanýshylarǵa zańbuzýshylyqtardy joıý úshin ýaqyt berildi. Eger talaptar oryndalmasa, kompanııalarǵa lıtsenzııalardy qaıtaryp alý men kelisimsharttardy buzýǵa deıingi qatań sharalar qoldanylatyny eskertildi.
Osyǵan deıin Qazaqstanda jer qoınaýyn paıdalanýshylardyń taýarlardy, jumystar men qyzmetterdi satyp alý kezindegi ishki eldik qundylyq úlesin arttyrý talaptaryn saqtamaǵany úshin jaýapkershiligi kúsheıtilgenin habarlaǵan bolatynbyz.
