Qaraǵandy oblysyndaǵy eki óndiristik apattan úsh adam kóz jumdy
QARAǴANDY. KAZINFORM — Qaraǵandy oblysynda úsh adamnyń ómirin qıǵan eki óndiristik jazataıym oqıǵaǵa qatysty tergeý júrgizilip jatyr. Eki derek boıynsha da arnaıy komıssııa qurylyp, qylmystyq is qozǵaldy.
Qaraǵandy oblysynda margarın zaýyty men qus fabrıkasynda bolǵan eki toptyq óndiristik jazataıym oqıǵa tergelip jatyr.
Qaraǵandy oblysynyń Memlekettik eńbek ınspektsııasy departamentiniń málimetinshe, margarın zaýyty aýmaǵynda jumys barysynda temirjol quramy jyljyp ketip, avtokólikke ornatylǵan konteınerge soǵylǵan. Sonyń saldarynan kólik quraly ornynan jyljyp, konteıner onyń janynda turǵan eki jumyskerdi konteınerler qataryna qysyp qalǵan. Eki jumysshy da alǵan jaraqattarynan kóz jumdy.
— Atalǵan jazataıym oqıǵa boıynsha bolǵan jaǵdaıdyń mán-jaıy men sebepterin anyqtaý úshin arnaıy komıssııa quryldy, — dep habarlady departamentte.
Ekinshi jazataıym oqıǵa qus fabrıkasynda boldy. Eńbek ınspektsııasynyń málimetine sáıkes, bıogaz qondyrǵysynyń kompressorlyq bólmesinde jınalyp qalǵan gaz tutanyp, keıin órt shyqqan. Saldarynan úsh qyzmetker túrli dárejedegi termııalyq kúıik aldy. Keıin olardyń biri aýrýhanada qaıtys boldy, al qalǵan ekeýi em qabyldap jatyr.
— Oqıǵanyń mán-jaıy men sebepterin anyqtaý úshin bul derek boıynsha da arnaıy komıssııa quryldy, — dep atap ótti vedomstvoda.
Qaraǵandy oblysy polıtsııa departamentiniń málimetinshe, eki oqıǵa boıynsha da qylmystyq ister qozǵaldy.
— Margarın zaýytyndaǵy oqıǵa boıynsha Qazaqstan Respýblıkasy Qylmystyq kodeksiniń 344-babynyń 3-bóligimen, al qus fabrıkasyndaǵy jazataıym oqıǵa boıynsha Qylmystyq kodekstiń 156-babynyń 3-bóligimen sotqa deıingi tergep-tekserý júrgizilýde. Oqıǵalardyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan keshendi tergeý áreketteri júrgizilip jatyr, — dep habarlady Qaraǵandy oblysy polıtsııa departamentiniń baspasóz qyzmeti.
Buǵan deıin Baıanaýyl aýdanyndaǵy «Maıkúben Vest» AQ aýmaǵynda burǵylaý-jarý jumystary kezinde 1984 jylǵy taý-ken sheberi aýyr jaraqat alyp, kóz jumǵanyn habarlaǵan bolatynbyz.
