Qaraǵandy oblysyndaǵy dala órtinde mal qyrylý deregi tirkelmegen

QARAǴANDY. KAZINFORM – Áleýmettik jelilerde Qaraǵandy oblysyndaǵy Qarqaraly aýdanynda dala órtinen maldar zardap shegim jatqany týraly vıdeo paıda boldy. Posttyń astynda janýarlar qyrylýy múmkin dep jazylǵan. Alaıda aýdan ákimi mal shyǵynyna qatysty derekter tirkelmegenin málimdeıdi, dep habarlaıdy Kazinform agenttiginiń tilshisi. 

Qarqaraly aýdany ákiminiń aıtýynsha, dala órtin joıý úshin barlyq shara qabyldanýda. Kúsh pen qarajat jetkilikti. Eldi mekenderge qaýip tónip turǵan joq. Bul týraly ol «24KZ» telearnasynyń tikeleı efırinde málimdedi.

«Terekti aýylynda TJ jónindegi vıtse-mınıstrdiń qatysýymen jedel shtab ashyldy. Órtti joıý boıynsha barlyq shara qabyldanýda. Kúsh pen qarajat jetkilikti. JJM tolyǵymen qamtamasyz etilgen. Qutqarýshylarǵa tamaq pen sý jetkizilýde. Qazirgi ýaqytta mal shyǵyny týraly aqparat joq. Alaıda biz barlyq fermermen baılanystamyz», - dedi Ádiljan Arǵynov. 

Ol barlyq jumys shtabtyń baqylaýynda ekenin atap ótti. Qutqarýshylar táýlik boıy jumys isteıdi, órtti sóndirýdi qatty ekpindi jeldiń soǵýy qıyndatýda. Qazirgi ýaqytta órt aýdany 35 000 ga quraıdy. 

Esterińizge sala keteıik, 6 qazanda Qarqaraly aýdanynda dala órti bastaldy. Órtti sóndirý kezinde 24-ÓSB azamattyq qorǵaý serjanty Halı Haırat qaza tapty. 

Osyǵan deıin Baıanaýylda órt shalǵan jerlerdiń aýmaǵy 10 myń gektarǵa jetkenin jazdyq. 

Aıta keteıik, Tótenshe jaǵdaılar mınıstrliginiń baspasóz qyzmeti Qaraǵandy oblysynda tutanǵan dala órtine baılanysty tyń málimetterdi jarııalady. 

Al, Qarqaraly aýdanynyń ákimi Ádiljan Arǵynov qazir áleýmettik jelilerde túrli kómek uıymdastyryp jatqandar týraly eskertti.