Qaraǵandy oblysyndaǵy Baıqasqa-2 qorǵanynan erekshe arheologııalyq oljalar tabyldy
ASTANA. KAZINFORM — Qaraǵandy oblysynyń Taldy tarıhı-arheologııalyq parkinde Baıqasqa-2 qorǵanyndaǵy qazba jumystary aıaqtaldy.
Ekspedıtsııany «Arheologııalyq zertteýler» JShS mamandary Qaraǵandy oblysynyń tarıhı-mádenı murany saqtaý ortalyǵynyń qoldaýymen júrgizdi.
Syrt kózge qarapaıym tóbeshikke uqsaǵan qorǵannyń astynan arheologtar kúrdeli qurylym ashty. Ol — iri taqtalarmen jabylǵan massıvti tas jáshik, tas pen balshyqtan turǵyzylǵan syrtqy qabat jáne aınaldyra sheńber qura ornalasqan qýatty tas beldeýler. Mamandardyń paıymdaýynsha, mundaı qurylystar ejelgi dáýirde joǵary mártebeli adamdarǵa arnalyp salynǵan.
– Bizdiń óńir úshin bul óte sırek kezdesetin eskertkish. Ásirese mańdaı tusynan tesilgen bas súıek synyǵy erekshe nazar aýdartty. Mundaı tabylym Ortalyq Qazaqstan aýmaǵynda óte sırek ushyrasady. Bul ǵuryptyq rásimniń belgisi nemese jerlengen adamnyń aıryqsha áleýmettik mártebesin bildirýi múmkin, – dedi «Arheologııalyq zertteýler» JShS qyzmetkeri Anvar Karımov.
Maýsymdaǵy negizgi tabylymdardyń qatarynda adam súıekteri, janýarlardyń qaldyqtary, qola men múıizden jasalǵan jebe ushtary, sondaı-aq órnekti keramıka bar.
Sonymen birge, qorǵannyń batys bóliginen keıingi kezeńge jatatyn 11 jerleý orny anyqtaldy. Bul aımaqtyń ejelden-aq qasıetti meken sanalǵanyn aıǵaqtaıdy.
Ekspedıtsııa Saryarqanyń saıyn dalasy áli talaı qupııany saqtap jatqanyn taǵy bir mártk dáleldedi. Árbir jańa tabylym kóne kóshpendilerdiń mádenıeti men dástúrin tereńirek tanýǵa jol ashady.
Aıta ketelik Túrkistan oblysyndaǵy arheologııalyq eskertkishter maqta alqabynyń astynda búlinip jatqany týraly jazǵan edik.