Qaraǵandy oblysyndaǵy aýyldyq mektepterdiń birinde týberkýlez anyqtaldy

QARAǴANDY. KAZINFORM – Qaraǵandy oblysynyń Buqar jyraý aýdanyndaǵy mektepterdiń birinde týberkýlezben syrqattaný deregi anyqtaldy. Ata-analar mekteptiń karantınge jabylmaǵanyna alańdap otyr. 

Buqar jyraý aýdanyndaǵy Doskeı aýylyndaǵy orta mektepte týberkýlezben syrqattaný faktisi profılaktıkalyq tekserý kezinde anyqtalǵan. Qaraǵandy oblysy densaýlyq saqtaý basqarmasynyń habarlaýynsha, syrqaty anyqtalǵan oqýshy buryn osy dertten emdelgen eken. 

— Buryn týberkýlezben esepte turǵan patsıentti profılaktıkalyq tekserý barysynda atalǵan aýrýdyń qaıtalanǵan asqynýy anyqtaldy. Derttiń qaıta órshýi jasóspirimniń jas ereksheligine baılanysty gormondyq qaıta qurý jáne ımmýnıtettiń tómendeýi saldarynan bolýy múmkin, — dep habarlady vedomstvodan.

Basqa oqýshylardyń ata-analary balalary mektepte týberkýlez juqtyrýy múmkin dep alańdaıdy. Alaıda, densaýlyq saqtaý basqarmasy oqý ornynda dezınfektsııa júrgizilgenin jáne dertke shaldyqqan balamen baılanysta bolǵandarǵa esh qaýip tónbeıtinin aıtady.

— Qazirgi ýaqytta patsıent barlyq qajetti em-dom túrlerin statsıonarda alyp jatyr. Jasóspirimniń oqý orny boıynsha qorytyndy dezınfektsııa júrgizildi. Barlyq baılanysta bolǵan adam tekserildi. Juqtyrý faktileri anyqtalǵan joq. Oqýshylardyń ata-analaryna sanıtarlyq-gıgıenalyq rejımdi saqtaý jáne juqtyrýdan qorǵaý sharalary jóninde nusqaý berildi. Qashyqtan oqytýdy uıymdastyrýdyń qajeti joq, — dep tolyqtyrdy oblystyń densaýlyq saqtaý basqarmasynda.

Buryn habarlanǵandaı, Atyraýda byltyr týberkýlezge shaldyqqan 764 adamǵa áleýmettik kómek berilgen.