Qaraǵandy oblysynda júkti áıelder medıtsınalyq mekemege zańsyz aqsha tólegen
QARAǴANDY.KAZINFORM – Qaraǵandy oblysynyń prokýratýrasy mindetti áleýmettik medıtsınalyq saqtandyrý salasyndaǵy zańdylyqtyń saqtalýyna tekserý júrgizdi. Tekserý barysynda áıelderden júktilikti jasandy túrde úzý qyzmetteri úshin negizsiz aqsha alynǵany anyqtaldy.
Qazaqstan Respýblıkasynyń zańnamasyna sáıkes atalǵan qyzmetter mindetti áleýmettik medıtsınalyq saqtandyrý júıesi aıasynda tegin kórsetilýi tıis.
MÁMS júıesinde saqtandyrylǵan patsıentter óz quqyqtaryn paıdalaný múmkindiginen negizsiz aıyrylyp, medıtsınalyq qyzmetter úshin óz qarajaty esebinen tólem jasaýǵa májbúr bolǵan.
Oblystyq prokýratýra málimetinshe, sońǵy 3 jyl ishinde medıtsınalyq qyzmetter úshin eki ret tólem alynǵan 775 jaǵdaı anyqtaldy. Olardyń jalpy somasy 22 mln teńge boldy.
Álıhan Bókeıhan aýdany prokýratýrasynyń usynýy boıynsha 218 áıelge jalpy somasy 7 mln teńge kóleminde qarajat qaıtaryldy. Qarajatty qaıtarý jumystary jalǵasyp jatyr.
Aıta keteıik, elde MÁMS aıasyndaǵy qyzmet kórsetýshilerge jańa talaptar engiziledi.
