Qaraǵandy oblysynda júk kólikterine 8 mln teńgeden astam aıyppul salyndy
QARAǴANDY. KAZINFORM — Qaraǵandy — Balqash jáne Qaraǵandy — Astana baǵytyndaǵy trassalarda júk pen jolaýshy tasymaly erejelerin buzý derekteri jıi tirkelip otyr. Sońǵy tekseristerdiń qorytyndysy boıynsha tasymaldaýshylarǵa salynǵan aıyppuldyń jalpy kólemi 8 mıllıon teńgeden asty.
Oblystyq kólik baqylaý ınspektsııasynyń málimetinshe, bul joldarda 21 quqyq buzý anyqtalǵan.
— Eń jıi kezdesetinderi — kóliktiń salmaqtyq jáne kólemdik normalaryn asyra júkteý, júrgizýshilerdiń eńbek jáne demalys rejımin saqtamaý, sondaı-aq aqyly joldar úshin tólemderdi ýaqytyly tólemeý, — dep túsindirdi ınspektsııada.
Qazir Almaty — Qaraǵandy tas jolynda táýlik boıy jumys isteıtin jyljymaly kólik baqylaý beketi bar. Taǵy bir beket Qaraǵandy — Osakarovka ýchaskesin patrýldeýde. Jaqyn ýaqytta eki avtomattandyrylǵan ólsheý stantsııasy iske qosylmaq. Olar «Sergek» júıesi boıynsha jumys isteıdi: zańbuzý týraly habarlama aýyr júk kólikteriniń ıelerine avtomatty túrde joldanady.
«QazAvtoJol» ulttyq kompanııasynyń aqparatyna súıensek, qazirgi tańda Qaraǵandy — Balqash jáne Qaraǵandy — Astana baǵytyndaǵy joldarda iri aqaýlar joq. Degenmen mamandar artyq júkteme joldyń oıylyp, shógýi men jaryqshaqtardyń tez paıda bolýyna tikeleı áser etedi dep moıyndaıdy.
— Mundaı zań buzý joldyń mejelengen qyzmet etý merzimin qysqartady ári bıýdjetke qosymsha salmaq túsiredi, — dep atap ótti kompanııada.
«QazAvtoJol» ókilderiniń aıtýynsha, eń tozǵan ýchaskeler negizinen karerler ornalasqan aımaqtarda. Máselen, artyq júktelgen kólikter Jańatalap aýyly mańyndaǵy Astana — Nura — Temirtaý baǵytynda, Botaqara irgesindegi Qaraǵandy — Aıagóz — Buǵaz trassasynda jáne Qarabas aýylynyń janynan ótetin Qyzylorda — Jezqazǵan — Qaraǵandy jolynda jıi qatynaıdy.
Sonymen birge mamandardyń aıtýynsha, óńirdegi negizgi magıstraldardyń kóbi áli 1960–70 jyldary, oske túsetin salmaqty bar bolǵany 8 tonna bolady dep eseptep salynǵan. Al qazirgi aýyr júk kólikteriniń qarqyny bul joldarǵa orasan zor júkteme túsirip otyr.
Eske salsaq, Oljas Bektenov avtokólik joldarynyń sapasyn baqylaýdy kúsheıtý týraly tapsyrma bergen edi.