Qaraǵandy oblysynda JRVI juqtyrǵandar sany eki esege jýyq azaıdy

QARAǴANDY. KAZINFORM - Bıyl óńirde jiti respıratorlyq vırýstyq ınfektsııa juqtyrǵandar sany ótken jylmen salystyrǵanda edáýir azaıǵan. Soǵan qaramastan, naýqastardyń jartysynan astamy – balalar. Sondaı-aq zerthanalyq tekserýler tumaý vırýsynyń da taralyp jatqanyn kórsetti.

JRVI, tumaý, naýqas. grıpp
Foto: DSM

Qazan aıynyń basynan beri Qaraǵandy oblysynda JRVI-diń 39 290 jaǵdaıy tirkeldi. Bul ótken jyldyń osy kezeńimen salystyrǵanda 1,9 ese az. Sonymen qatar óńirde aýrýshańdyq deńgeıi epıdemıologııalyq shekten asqan joq.

Aýyrǵandardyń basym bóligi – balalar, tirkelgen jaǵdaılardyń 55 paıyzy. Ázirge mektepterdegi jaǵdaı da turaqty. Birde-bir synypta syrqattanǵan oqýshylardyń úlesi 20 paıyzǵa jetpegen. Al bul kórsetkishke jetken jaǵdaıda ınfektsııanyń taralýyn shekteý úshin tıisti sharalar qarastyrylady.

Jalpy aýrýshańdyq tómendegenimen, tumaý juqtyrý derekteri de tirkelip jatyr. Epıdemıologııalyq maýsym bastalǵaly zerthanalyq taldaý nátıjesinde A tıpti (H1N1) tumaýdyń alty jaǵdaıy rastalǵan. Naýqastardyń ekeýi – 14 jasqa deıingi balalar. Olardyń eshqaısysy tumaýǵa qarsy vaktsına almaǵan.

Budan bólek, óńirde rınovırýs, bokavırýs, adenovırýs jáne paragrıpp vırýstary da anyqtalyp otyr. JRVI belgilerimen dárigerge qaralǵan naýqastardan alynǵan 381 synamany zertteý nátıjesinde atalǵan vırýstar anyqtalǵan qozdyrǵyshtardyń 37 paıyzyn quraǵan.

Al tumaýǵa qarsy ekpe salý naýqany jalǵasyp jatyr. Qazirdiń ózinde Qaraǵandy oblysynda 120 myńnan astam turǵyn vaktsına alǵan.

Buǵan deıin Soltústik Qazaqstan oblysynda shamamen 1,5 aıdyń ishinde 17,5 myńnan astam adam jiti respıratorlyq vırýstyq ınfektsııa juqtyrǵanyn habarlaǵan bolatynbyz.